تاسماعامبەتوۆ اقتاۋداعى ساربازداردىڭ ولىمىنەن كەيىن بىرنەشە كومانديردى قىزمەتىنەن بوساتتى

استانا. قازاقپارات - اقتاۋدا وقۋ-جاتتىعۋ كەزىندە اسكەري قىزمەتشىلەردىڭ قازا بولۋ فاكتىسى بويىنشا اسكەري پروكۋراتۋرا قىلمىستىق ءىس قوزعادى، دەپ حابارلايدى ق م باسپا ءسوز قىزمەتى.

الدىن الا تەكسەرۋ جانە تەرگەۋ قورىتىندىسى بويىنشا قورعانىس ءمينيسترىنىڭ شەشىمىمەن پولكوۆنيك مۇرات نۇعىمانوۆ قىزمەتىنەن شەتتەتىلىپ، «باتىس» وڭىرلىك قولباسشىلىعىنىڭ قولباسشىسى قىزمەتىنەن بوساتىلدى.

سونىمەن قاتار، «باتىس» وڭىرلىك قولباسشىلىعى قولباسشىسىنىڭ ءبىرىنشى ورىنباسارى - شتاب باستىعى ريزات قولپاشيەۆتى، «باتىس» وڭىرلىك قولباسشىلىعى قولباسشىسىنىڭ جاۋىنگەرلىك دايارلىق بويىنشا ورىنباسارى، پولكوۆنيك مەرگەن قاپاشيەۆتى، تەڭىز جاياۋ اسكەرى بريگاداسىنىڭ كومانديرى، پودپولكوۆنيك ەربولات تولىقبايەۆتى قىزمەتىنەن بوساتۋ تۋرالى شەشىم قابىلداندى. ولاردىڭ بۇدان ارعى جاۋاپكەرشىلىگىن اسكەري پروكۋراتۋرانىڭ تەرگەۋ شارالارىنىڭ ناتيجەسى بويىنشا سوت ورگاندارى انىقتايتىن بولادى.

ۆەدومستۆو باسشىسى 19- قىركۇيەكتە اقتاۋعا وقيعا ورنىنا بارىپ، اسكەري گوسپيتالدا جاتقان ساربازداردىڭ كوڭىلىن سۇراپ، وسىنداي قاۋىپتى ءارى ەكسترەمالدى جاعدايداعى ۇتىمدى ارەكەتتەرى ءۇشىن العىسىن ايتتى جانە تەز ارادا ساۋىعىپ كەتۋلەرىنە تىلەكتەستىگىن ءبىلدىردى. سونداي-اق، جان-جاقتى مەديتسينالىق تەكسەرۋمەن قاتار، پسيحولوگيالىق كومەك كورسەتۋدى تاپسىردى.

ەسكە سالا كەتەيىك، 18- قىركۇيەكتە، كاسپيدەگى وقۋ-جاتتىعۋ بارىسىندا مەرزىمدى قىزمەتتىڭ 4 اسكەري قىزمەتشىسى سۋعا كەتكەن.