بەيجىڭدە قازاقستاندىق كەلىسىم مەن ۇلتتىق بىرلىك ۇلگىسى تالقىلاندى - فوتو

بەيجىڭ. قازاقپارات - كەشە ق ح ر- داعى ق ر ەلشىلىگى عيماراتىندا قازاقستان حالقى اسسامبلەياسى ءتوراعاسىنىڭ ورىنباسارى - قازاقستان رەسپۋبليكاسى پرەزيدەنتى اكىمشىلىگىنىڭ قازاقستان حالقى اسسامبلەياسى حاتشىلىعىنىڭ مەڭگەرۋشىسى ەرالى توعجانوۆتىڭ باسشىلىعىمەن قازاقستاندىق دەلەگاتسيا «قازاقستان حالقى اسسامبلەياسى جىلى: قوعامدىق كەلىسىم مەن ۇلتتىق بىرلىكتىڭ قازاقستاندىق ۇلگىسى» اتتى دوڭگەلەك ۇستەلگە قاتىستى.

شارانى ق ح ر- داعى ق ر ەلشىلىگى ۇيىمداستىردى. وعان شاڭحاي ىنتىماقتاستىق ۇيىمىنىڭ (ش ى ۇ) باس حاتشىسى دميتري مەزەنتسيەۆ، قىتايداعى ەلشىلەر - اندرەي دەنيسوۆ (رەسەي)، كانايىم باكتىعۇلوۆا (قىرعىزستان)، چينار رۋستاموۆا (تۇركمەنستان)، لاتيف گانديلوۆ (ازەربايجان)، تاجىك، بەلارۋس، ۋكراين ديپلوماتتارى، قىتايدىڭ شەت ەلدەرمەن حالىقتىق دوستىق قوعامى وكىلدەرى، ق ح ر مەملەكەتتىك ۇلتتار ءىسى كوميتەتى قىزمەتكەرلەرى، قىتايلىق عالىمدار توبى وكىلدەرى، ب ا ق جانە بەيجىڭ ج و و- لارىندا وقيتىن قازاقستاندىق جاستار قاتىستى.

بۇگىنگى تاڭدا ەتنومادەني بىرلەستىكتەر قازاقستاندا ازاماتتىق قوعامنىڭ قۋاتتى ينستيتۋتىنا اينالدى، ولار ءداستۇرىمىزدى، مادەنيەتىمىزدى، ءتىلىمىزدى ساقتاپ قانا قويماي، مەملەكەتارالىق قاتىناستىڭ «ءتىرى كوپىرىنە» اينالدى. پرەزيدەنتىمىز ەتنومادەني بىرلەستىكتەردىڭ الەۋەتىن پايدالانا وتىرىپ، ينۆەستيتسيا جانە يننوۆاتسيالىق تەحنولوگيانى تارتۋدى تاپسىردى.

مىسالى، قازىرگى تاڭدا قازاقستاندا 100 مىڭداي كورەيلىك بار، ولار بۇگىنگى تاڭدا وزىق تەحنولوگيالار مەن ينۆەستيتسيا تارتۋدا اۋقىمدى جۇمىس اتقارىپ جاتىر. بۇرىن ق ر ازاماتى بولعان 800 مىڭ نەمىس قازىر گەرمانيادا تۇرىپ جاتىر، ولار مىقتى جەرلەستەر قوعامىن قۇرعان. بۇرىنعى وتانداستارىمىزدىڭ ءبىرى بۋندەستاگتىڭ دەپۋتاتى بولدى. قازاقستاندى ساعىناتىنىن ايتادى»، - دەدى دوڭگەلەك ۇستەلگە قاتىسۋشىلارعا ارنالعان سوزىندە ە. توعجانوۆ.

ول قازاقستان حالقى اسسامبلەياسى قىزمەتىنە، ونىڭ ق ر حالقىنىڭ رۋحاني كەلىسىمى جانە تاتۋلىعىنداعى رولىنە تەرەڭىرەك توقتالىپ ءوتتى.

«ءبىز 2008-جىلى ب ۇ ۇ- عا قازاقستان حالقى اسسامبلەياسى مودەلىن تانىستىردىق. رەسمي تانىستىرىلىم 56 ەۋروپالىق ەلدىڭ قاتىسۋىمەن ە ق ى ۇ- دا وتكىزىلدى. انگليالىق بيزنەسمەندەر لوندوندا قازاقستاندىق تاتۋلىق جانە كەلىسىم ورتالىعىن قۇرۋ باستاماسىن كوتەردى، ءبىز ولاردى قولدادىق. سوڭعى ءبىر جارىم جىلدا مەن تاتۋلىق پەن كەلىسىم سالاسىندا تاجىريبە الماسۋعا قىزىعۋشىلىق بىلدىرگەن 22 ەلدىڭ وكىلدەرىن قابىلدادىم»، - دەدى ە. توعجانوۆ.

قازاقستان حالقى اسسامبلەياسى ءتوراعاسىنىڭ ورىنباسارى قازاقستاندىق ۇلگىنىڭ مىنسىزدىگى تۋرالى شەتەلدىك جۋرناليستەر ءجيى قوياتىن سۇراققا ءوزىنىڭ قازاقستاننىڭ ءاربىر ازاماتى ەتنيكالىق، ءدىني، تاعى باسقا دا وزگەشەلىكتەرىنە قاراماستان ءوزىنىڭ ءتۇپ-تامىرىمەن - ءتىلى، سالت-ءداستۇرى، مادەنيەتىمەن تەرەڭ بايلانىستا بولۋى كەرەك دەپ جاۋاپ بەرەتىنىن ايتتى.

ەسكە سالا كەتەيىك، قازاقستاندىق دەلەگاتسيا قۇرامىنا پارلامەنت ءماجىلىسىنىڭ دەپۋتاتتارى زۋحرا ساياپوۆا، نادەجدا ناستەروۆا، «دۇڭعان ەتنومادەني ورتالىقتار قاۋىمداستىعى» ا ا باسقارماسىنىڭ مۇشەسى شاكىر حاحازوۆ، «قازاقستان رەسپۋبليكالىق ۇيعىر مادەني ورتالىعى»  ا ا ءتوراعاسى شايماردان نۇرۇموۆ، ق ح ا الماتى وبلىسى بويىنشا حاتشىلىق مەڭگەرۋشىسى عابيت تۇرسىنباي، ق ر پ ءا ق ح ا حاتشىلىعىنىڭ ينسپەكتورى ەدىل وسپان، ق ر س ءى م سىرتقى ساياسي تالداۋ جانە بولجاۋ دەپارتامەنتىنىڭ كەڭەسشىسى ايدا ەرمەكقاليەۆا كىردى.