قىزىلوردادا «تۋعان ءتىلىم - تىرەگىم» تاقىرىبىندا جاس اقىندار ءمۇشايراسى ءوتتى

قىزىلوردا. قازاقپارات - كەشە قارماقشى اۋداندىق «جىراۋلار ۇيىندە» اۋداندىق مادەنيەت جانە تىلدەردى دامىتۋ ءبولىمى جانە اۋداندىق «جىراۋلار ءۇيىنىڭ» ۇيىمداستىرۋىمەن «تۋعان ءتىلىم - تىرەگىم» اتتى اۋداندىق جاس اقىندار ءمۇشايراسى وتكىزىلدى، دەپ حابارلادى اۋداندىق اكىمدىكتىڭ باسپا ءسوز قىزمەتىنەن.

جازبا اقىندار ءمۇشايراسىنىڭ باستى ماقساتى مەن مىندەتتەرى: جاستاردىڭ ءوز انا تىلىنە دەگەن قۇرمەت سەزىمىن ارتتىرۋ، ءتىل مارتەبەسىن كوتەرۋ، تازا سويلەۋگە ۇيرەتۋ، ءوز ۇلتىنا، ەلىنە دەگەن سۇيىسپەنشىلىگىن وياتۋ. انا ءتىلىمىزدىڭ تۇعىرىنىڭ مىقتى بولۋىنا نەگىز قالاعان بابالارىمىزدىڭ وسيەتىن ۇران ەتۋ، قازاق ءتىلىنىڭ مارتەبەسىن كوتەرۋ. سونداي-اق دارىندى جاستاردى قولداۋ، شىعارماشىلىعىن دامىتۋ، جاستاردىڭ تالانتىن شىڭداۋ جانە ولاردى ىنتالاندىرۋ.

ءمۇشايراعا اۋدان مەكتەپتەرى مەن اگرارلىق-تەحنيكالىق كوللەدجىنەن 19 تالاپكەر قاتىستى. قازىلار القاسىندا قۇلدۇيسەنوۆ ءابدىراحمان - «قازاق ءتىلى» قوعامىنىڭ ءتوراعاسى، التاي ۇسەنوۆ - اقىن، اۋداندىق «قارماقشى تاڭى» گازەتىنىڭ رەداكتورى، ايداروۆ سەرىك - اۋداندىق مادەنيەت جانە تىلدەردى دامىتۋ ءبولىمىنىڭ باس مامانى تالاپكەرلەرگە ءادىل باعاسىن بەردى.

ناتيجەسىندە باس جۇلدە - كەڭشىلىكوۆا گۇلفاريزا 30№ مەكتەپ، 1- ورىن - تەڭەلبايەۆا تولقىن 80№ مەكتەپ، 2- ورىن - قاسىم نۇراي 185№ مەكتەپ، 3- ورىندى ساقتاپبەرگەن ارمان 26№ مەكتەپ جانە تولەگەنوۆا ءمولدىر 183№ مەكتەپ ءوزارا ءبولىستى.

تاعى دا ۇيىمداستىرۋ القاسى دايىنداعان «ءتىل شەبەرى» اتالىمى - اگرارلىق- تەحنيكالىق كوللەدجىنىڭ Ⅱ كۋرس ستۋدەنتى ارىستانبەكوۆا ايمەرەكەگە، «ۇشقىر وي» - 121№ مەكتەپ وقۋشىسى امانتاي ادەمىگە، «ۇزدىك شىعارما» اتالىمىنىڭ جۇلدەسى 27№ مەكتەپ وقۋشىسى تويبازاروۆا ديلبنازعا بۇيىردى. قالعان 11 تالاپكەرلەر مادەنيەت جانە تىلدەر دامىتۋ ءبولىمىنىڭ ارنايى العىس حاتى جانە سىيلىقتارىمەن ماراپاتتالدى.

اۆتور: ەلۋباي اۋەزوۆ