الەم اپتا ىشىندە: «د ا ي ش» تاعى دا لاڭكەستىك ارەكەتتەرگە كوشتى
ماسەلەن، گەرمانيانىڭ ماينداعى فرانكفۋرت قالاسىندا اشىلعان 66- حالىقارالىق اۆتوموبيل سالونى ميلليونداعان جاننىڭ نازارىن اۋدارتسا، باعداتتاعى ءۇش جارىلىس پەن فرانسيانىڭ ءالپى تاۋىندا 7 الپينيستىڭ قازاعا ۇشىراۋى تالايدىڭ جانىن تۇرشىكتىردى.
فرانكفۋرتتاعى كولىكتەر كورمەسى
سەيسەنبى كۇنى گەرمانيانىڭ ماينداعى فرانكفۋرت قالاسىندا 66- حالىقارالىق اۆتوموبيل سالونى ءوز جۇمىسىن باستادى. ول جەنەۆا اۆتوسالونىمەن قاتار ەكى جىلدا ءبىر رەت وتەدى جانە ەۋروپاداعى ماڭىزدى ءارى الەمدەگى ءىرى كولىك كورمەلەرىنىڭ ءبىرى سانالادى.
اعىمداعى جىلى فرانكفۋرت اۆتوسالونىنىڭ ۇرانى - «New Mobility World». ماينداعى فرانكفۋرتتاعى وسى جولعى اۆتوموبيل كورمەسىنىڭ باستى تاقىرىبى - ىلگەرى كوممۋنيكاتسيالىق جۇيەلەرى بار اۆتوموبيل تەحنولوگيالارىن جانە ادامنىڭ قاتىسۋىنسىز اۆتوماتتى قوزعالىس جۇيەسىن دامىتۋ.
كورمە بارىسىندا Bentley كومپانياسىنىڭ العاشقى سەريالىق جول تالعامايتىن كولىگى Bentayga ءاۆتومبيلى تانىستىرىلدى. كولىكتىڭ فيرمالىق دوڭگەلەك شامدارى، حرومدالعان رادياتور شىلتەرى، قوسارلانعان ءتۇتىن شىعاراتىن جۇيەسى جانە كەڭ كولەمدى ليۋگى بار.
Jaguar مەحانيكتەرى وزدەرىنىڭ ەڭ ءبىرىنشى F- Pace كروسسۆەرىن تانىستىرماق. ال كورەيلىك Hyundai برەندى بولسا بۇل اۆتوسالوندا وزدەرىنىڭ بىرنەشە جوباسىن ۇسىنىپ وتىر. ولاردىڭ قاتارىندا كەيىنگى ۋاقىتتا ەڭ كوپ تالقىلاۋعا تۇسكەن Hyundai N 2025 Vision Gran Turismo concept كولىگىنىڭ تولىققاندى ماكەتى بار.
BMW بولسا، جۇرتشىلىق نازارىنا شاعىن جول تالعامايتىن كولىكتىڭ ەكىنشى بۋىنى سانالاتىن X1 كروسسوۆەرىن ۇسىنادى. بريتاندىق Rolls-Royce كومپانياسى ءوزىنىڭ جاڭا Dawn كابريولەتىن تانىستارادى. ايتا كەتەرلىگى، بۇل كولىكتىڭ ديزاينى Rolls-Royce Wraith اۆتوموبيلىنە ءبىرشاما ۇقساس.
سونىمەن قاتار فرانكفۋرت اۆتوسالونىنا كەلگەن جۇرتشىلىق Kia Sportage كولىگىنىڭ جاڭا بۋىنىمەن دە تانىس بولا الادى. كروسسوۆەردىڭ ديزاينى ءبىرشاما وزگەرىسكە ءتۇسىپ، بارىنشا سپورتتىق كولىككە بەيىمدەلگەن. جاپوندىق Suzuki كومپانياسى ۆ- سىنىپتى Baleno حەتچبەگىنىڭ جاڭارتىلعان مودەلىن تانىستىردى. جاڭا كولىكتىڭ سىرتى ءتۇر- سيپاتى اعىمداعى جىلى جەنيەۆا اۆتوسالونىندا كورسەتىلگەن iK-2 مودەلىنەن ەش ايىرماشىلىعى جوق دەسەك تە بولادى. ءبىر عانا ايىرماشىلىعى - جاڭا حەتچبەكتىڭ كولەمى ۇلكەن. ال Skoda SportLine دەپ اتالاتىن Superb Combi ۋنيۆەرسالىنىڭ سپورتتىق نۇسقاسىن الىپ كەلگەن. نەمىس كونسترۋكتورلارى بولسا، كورمەگە Audi A4 كولىگىنىڭ جاڭا ءتۇرىن قويعان.
اۆتوموبيل ءوندىرىسىنىڭ ەڭ سوڭعى جەتىستىكتەرى تانىستىرىلعان اۆتوشوۋعا الەمنىڭ 39 ەلىنەن مىڭنان استام كومپانيا قاتىسۋدا. اۆتوسالون بارىسىندا 219 جاڭا كولىك ءتۇرىن تانىستىرۋ جوسپارلانعان.
باعداتتا ءۇش جارىلىس ورىن الدى
بەيسەنبى كۇنى باعداتتىڭ شييتتەر باسىم تۇراتىن باب ال- شاردجي ورتالىق اۋدانىندا قاتارىنان 2 جارىلىس ورىن العان بولعان. ەكى ماشيناعا جاسىرىلعان بومبانى 2 لاڭكەس جانكەشتى ىسكە قوسقانى بەلگىلى. ءسال كەيىنىرەك جەرگىلىكتى اقپارات اگەنتىگى نەگىزىنەن شييتتەر تۇراتىن يراك استاناسىنىڭ باب ال- مۋادام ورامىندا دا ءۇشىنشى جارىلىستىڭ ورىن العان تۋرالى اقپارات تاراتتى.
بۇقارالىق اقپارات قۇرالدارى تاراتقان اقپاراتتارعا قاراعاندا، يراك استاناسىندا ورىن العان لاڭكەستىك ارەكەتتەردەن كەمىندە 28 ادام قازا تاۋىپ، تاعى 121 ادام ءتۇرلى دارەجەدە جاراقات العان.
رەسمي دەرەكتەرگە سايكەس لاڭكەستەردىڭ بارلىعى دا جەكە-جەكە جارىلىس ورىن العان جەرگە جاياۋ جەتكەن. جارىلىس ورىن العاننان كەيىنگى العاشقى مينۋتتاردا ەشكىم دە جارىلىس جاۋاپكەرشىلىگىن ءوز مويىندارىنا العان جوق. دەگەنمەن، ءسال كەيىنىرەك بۇل جارىلىستاردى «د ا ي ش» لاڭكەستىك توبى ۇيىمداستىرعانى بەلگىلى بولدى.
شىلدە ايىنىڭ ورتاسىندا يراك ۇكىمەتى ەلدىڭ باتىس ولكەسى انباردى «د ا ي ش» لاڭكەستەرىنەن ازات ەتۋ بويىنشا كەڭ اۋقىمدى وپەراتسيانىڭ باستالعانىن مالىمدەگەن ەدى. ۇكىمەتتىك اسكەر وڭىردەگى ەكى ءىرى قالا ەر- رامادي مەن ەل- فاللۋدجاعا باعىت العان بولاتىن.
«د ا ي ش» لاڭكەستىك توبى وتكەن جىلدىڭ جاز ايىنان يراكتىڭ سولتۇستىگىندە بەلسەندى شابۋىلدارىن باستاعان- دى. قازىرگى ۋاقىتتا قارۋلى لاڭكەستىك توپ يراك اۋماعىنىڭ ۇشتەن ءبىرىن، ال انبار ولكەسىنىڭ شامامەن 80 پايىزىن باقىلاۋىندا ۇستاپ وتىر.
ءالپى تاۋىندا قار كوشكىنىنەن 7 الپينيست قازا تاپتى
سەيسەنبى كۇنى فرانتسيانىڭ باتىسىندا، «ەكرەن» ۇلتتىق پاركىندە قار كوشكىنى سالدارىنان 7 ادام قازا تاۋىپ، تاعى ءبىرى جاراقات الدى. قايعىلى وقيعا ءتۇس اۋا پەلۆۋ تاۋلى القابىندا، دوم- دە- نەج- دەز- ەكرەن شىڭى اۋدانىندا 4 مىڭ مەتر بيىكتىكتە ورىن الدى.
باستاپقىدا جەرگىلىكتى بيلىك 5 ادامنىڭ قازا تاپقانىن حابارلاعان بولاتىن. كەيىننەن مەرت بولعانداردىڭ سانى ارتتى. قازا تاپقانداردىڭ اراسىندا 3 نەمىس پەن 2 چەح بار. قۇتقارۋشىلاردىڭ اقپاراتىنا سايكەس، توپتىڭ تەك 1 مۇشەسى عانا ءتىرى قالعان.
رەسمي دەرەككە سايكەس، قار كوشكىنى الپينيستەردىڭ ءۇش توبىن بىردەي باسىپ قالعان. وقيعا ورنىندا باسقا دا قار كوشكىنى استىندا قالعان ادامداردىڭ جوق ەكەندىگىنە سەنىمدى بولۋ ءۇشىن قۇتقارۋ جۇمىستارى جۇرگىزۋدە. وعان 2 تىكۇشاق پەن ارنايى ۇيرەتىلگەن 12 يت جۇمىلدىرىلعان.
ايتا كەتەيىك، پەلۆۋ سىلەمىندە وسى جىلدىڭ ىشىندە ەكىنشى مارتە قار كوشكىنى ورىن الىپ وتىر. ءساۋىر ايىنداعى كوشكىن بارىسىندا 2 اۋستراليالىق الپينيست قازا بولعان ەدى. «قار كوشكىنىن زەرتتەۋشىلەر قاۋىمداستىعى» مالىمەتتەرىنە سايكەس، فرانتسيانىڭ ءالپى تاۋلارىندا جىل سايىن ورىن الاتىن قار كوشكىنىنەن وتىزعا جۋىق ادام قازا تابادى.
اۆتور: مارلان جيەمباي
