جۇمىسسىز ءجۇرىپ، ءوز دۇكەنىن اشتى

استانا. قازاقپارات - ايەل زاتى - وتباسىنىڭ ۇيىتقىسى، ۇلتتىڭ ءوسىپ- ونۋىنە ىقپال ەتۋشى، ۇرپاق تاربيەشىسى، ءتىپتى قازىرگى كۇنى قىزمەتتىڭ قاي سالاسىن الىپ قاراساڭىز دا، قىز- كەلىنشەكتەر از ەمەس.

ايەل -  انا. ول -  ەل تىرەگى، قوعام مەن ۇلتتىڭ بايلانىستىرۋشىسى.

قوعامىمىزدا كاسىپكەر ايەلدەردىڭ دە قاتارى كۇن ساناپ ارتىپ كەلە جاتىر. سونداي نازىك جاندى ارۋ، اياۋلى انا -  ءاليا توقسانوۆا.

ول سەمەي قالاسىنداعى كەڭەستىك ساۋدا تەحنيكۋمىن بىتىرگەن. تۋعان اۋىلى كوكپەكتىدە 3 جىل اسحانا مەڭگەرۋشىسى بولىپ جۇمىس جاساپ، ودان كەيىن الماتى وبلىسىنداعى جاركەنت اۋىلىنا كەلىپ، ەت كومبيناتىندا توڭازىتقىش سەحىندا ىستەگەن. «سول جەردە 3 جىل اۋىلدىق كەڭەستىڭ دەپۋتاتى بولا ءجۇرىپ، ساۋدا- ساتتىق سالاسىنا جەتەكشىلىك ەتتىم، -  دەيدى ءبىزدىڭ كەيىپكەر. -  تۇرمىس قۇرىپ، بالالى بولعاننان كەيىن، 1991-2001 -جىلدارى كادر ءبولىمىنىڭ باسشىسى قىزمەتىن اتقاردىم، تاعى ءبىر جىل اسحانا سالاسىندا باسشىنىڭ ورىنباسارى قىزمەتىن اتقاردىم. مىنە، وسىلاي مەنىڭ كەڭەس ۇكىمەتى جىلدارىندا اتقارعان قىزمەتىم اياقتالدى. شارۋاشىلىقتار جەكە قوجالىقتارعا كوشكەندىكتەن، جالپى كۇنكورىس قامىمەن الماتىعا كەلىپ، قارا بازاردا ايەلدەر كيىمىن ساتتىم. ىستىق- سۋىقتا ءجۇرىپ، اۋىرىپ ءبىر جىل جۇمىسسىز ۇيدە جاتتىم.

 2005 -جىلدىڭ اياعىنان باستاپ، 3-4 اي دۇكەنشى بولىپ جۇمىس جاساپ، ودان ءارى قاراي ءوزىمنىڭ ازىق- تۇلىك دۇكەنىمدى اشىپ، قازىرگى كۇنگە دەيىن ءناسىبىمدى تاۋىپ، حالىققا كومەگىمدى تيگىزىپ وتىرمىن. جەكە شاعىن كاسىپكەرلىكپەن اينالىسۋعا مەملەكەتتىڭ قولداۋى جاقسى. قازىرگى كۇنى جۇمىسسىز جۇرگەن ادامدار قانشاما؟»

جەكە كاسىپپەن اينالىسقان ادامدار جالپى ورتادان وزدەرىنىڭ بىلىكتىلىگىمەن، شەبەرلىگىمەن، قاجىماس قايراتتىلىعىمەن ەرەكشەلەنەتىندىگىن اتاپ وتكەن ءجون. بۇرىنعى زاماندا ەگىن شىقپاي قالۋ نەمەسە جۇت بولعان جاعدايدا داعدارىسقا ۇشىراماي، قيىندىققا مويىنسىنباي ارەكەت ەتىپ، بالىق اۋلاي ما، تۇز تارتا ما نەمەسە قولىنىڭ شەبەرلىگىمەن قوسالقى جۇمىس جاساپ، تابىس تابا ما، ايتەۋىر كاسىبىن قىلىپ، كۇن كورىسىن جوندەپ الاتىن ادامدار بولعانى بەلگىلى. حالىق اراسىندا كاسىپتى، كاسىپكەرلىكتى ماداقتايتىن، قۇرمەتتەيتىن ناقىل سوزدەر، ماقالدار مەن ماتەلدەردىڭ تارالۋى - وسىنىڭ دالەلى.

- ءار ادامعا ءوز ءىسىنىڭ ناعىز مامانى اتانۋ بارشانىڭ باعىنا بۇيىرماعان. ول ءۇشىن ەڭ الدىمەن، ءوز ماماندىعىڭىزعا ماحاببات كەرەك. ماحابباتپەن ىستەلگەن جۇمىس قانا ناتيجە بەرمەك. ماماندىعىڭىز ءسىزدىڭ سۇيىكتى ىسىڭىزگە اينالۋى قاجەت. بۇل جاعدايدا ادام جۇمىسقا ەرەكشە قۇلشىنىسپەن كىرىسىپ، جۇمىسىنان ءلاززات العاندا عانا ءوز ىسىنە ريزا بولارى ءسوزسىز. ءوز جانىڭىزعا جاقىن ماماندىقتى ىزدەپ تابۋ دا بارىنشا كۇردەلى جۇمىس. سوندىقتان ءوز كاسىبىڭىزدەن جاڭىلماي، ءوز ءومىرىڭىزدىڭ ءبىر كىرپىشىن دۇرىس قالاعانىڭىز دۇرىس، - دەيدى كاسىبىن دوڭگەلەتىپ، جەكە دۇكەن اشقان ءاليا توقسانوۆا.

ايقىن- اقپارات