مەملەكەتتىك اكىمشىلىك لاۋازىمدارىنا ىرىكتەۋدىڭ جاڭا جۇيەسى ەنگىزىلەدى

استانا. قازاقپارات - كەشە پارلامەنت ءماجىلىسىنىڭ جالپى وتىرىسىندا پالاتا دەپۋتاتتارى «قازاقستان رەسپۋبليكاسىنىڭ مەملەكەتتىك قىزمەتى تۋرالى» زاڭ جوباسىن ءبىرىنشى وقىلىمدا ماقۇلدادى.  

اتالعان قۇجات ەلباسى ايقىنداعان «100 ناقتى قادام» ۇلت جوسپارىنداعى مەملەكەتتىك اپپاراتتىڭ كاسىبيلىگى مەن دەربەستىگىنە باعىتتالعان شارالاردى جۇزەگە اسىرۋعا باعىتتالادى.

زاڭ جوباسىنىڭ نەگىزگى ماقساتى مەملەكەتتىك قىزمەتكە كىرۋگە، ونى وتكەرۋگە جانە توقتاتۋعا بايلانىستى قوعامدىق قاتىناستاردى رەتتەۋ بولىپ تابىلادى. اتاپ ايتقاندا، زاڭ جوباسىمەن ازاماتتاردى «ب» كورپۋسىنىڭ مەملەكەتتىك اكىمشىلىك لاۋازىمدارىنا ىرىكتەۋدىڭ جاڭا جۇيەسى ەنگىزىلەدى. ماسەلەن، «ب» كورپۋسىنىڭ مەملەكەتتىك اكىمشىلىك لاۋازىمدارىنا العاش رەت نەمەسە قايتادان كىرىپ وتىرعان ازاماتتار ءبىرقاتار ىرىكتەۋ ساتىلارىنان وتەدى.

 «قۇجات تۇتاستاي العاندا مەملەكەتتىك قىزمەت سالاسىندا اشىق كونكۋرستىق ىرىكتەۋدى قامتاماسىز ەتۋگە، قۇزىرەتتىلىك نەگىزىندە ماقساتتىق، ياعني لاۋازىمدىق جوعارىلاتۋعا، ناتيجەگە بايلانىستى ەڭبەكاقىنى انىقتاۋعا باعىتتالادى. بۇل شارالار مەملەكەتتىك قىزمەتتەگى تامىر- تانىستىق پەن زاڭسىز قامقورشىلىققا قارسى قيمىلداردى قامتيدى ءارى قوعامنىڭ قاجەتتىلىگىنە تولىق جاۋاپ بەرەدى»، - دەدى مەملەكەتتىك قىزمەت ىستەرى جانە سىبايلاس جەمقورلىققا قارسى ءىس- قيمىل اگەنتتىگىنىڭ ءتوراعاسى قايرات قوجامجاروۆ.

ونىڭ ايتۋىنشا، مەملەكەتتىك قىزمەتكە قابىلداۋ ءۇش كەزەڭنەن تۇراتىن كونكۋرستىق ىرىكتەۋ ارقىلى جۇزەگە اساتىن بولادى. بۇل رەتتە ءبىرىنشى كەزەكتە كانديداتتار زاڭداردى ءبىلۋ مەن قۇزىرەتتىلىك بويىنشا تەستىلەۋدەن وتەدى. ەكىنشىدەن، مەملەكەتتىك قىزمەتكەرلەر قۇندىلىعىن ۇستانۋ بويىنشا  كوميسسيالىق باعالاۋلار بولادى. ءۇشىنشى كەزەكتە مەملەكەتتىك ورگان سۇحباتتاسۋ ارقىلى كانديداتتىڭ كاسىبي ءبىلىمىن، بىلىكتىلىگىن ايقىندايتىن بولادى. «كونكۋرستان ءساتتى وتكەندەر ءۇشىن ۇشتەن التى ايعا دەيىنگى ارالىقتا سىناق مەرزىمى بەلگىلەنەدى. سىناق مەرزىمىنەن وتە الماعاندار جۇمىستان بوساتىلادى»، - دەدى ق. قوجامجاروۆ.

بۇدان بولەك، مەملەكەتتىك قىزمەتشىلەردىڭ كاسىبي الەۋەتىن نەعۇرلىم ءتيىمدى پايدالانۋدى قامتاماسىز ەتۋ ماقساتىندا مەملەكەتتىك اكىمشىلىك قىزمەتتەردىڭ روتاتسياسى جۇزەگە اسىرىلادى. ال مەملەكەتتىك قىزمەتشىلەر باسقا جەرگە روتاتسيا كەزىندە جەكەشەلەندىرۋ قۇقىعىنسىز مەملەكەتتىك تۇرعىنجايمەن قامتاماسىز ەتىلەتىن بولادى.

اۆتور:   قانات مامەتقازى ۇلى