قاراعاندى وبلىسىنىڭ نۇرا اۋدانىندا كوكتەمگى سۋ تاسقىنىنان زارداپ شەككەندەرگە تۇرعىن ۇيلەر تولىق تاپسىرىلدى - فوتو

قاراعاندى. قازاقپارات - قاراعاندى وبلىسىنىڭ اكىمى نۇرمۇحامەد ابدىبەكوۆ نۇرا اۋدانىنا جاساعان جۇمىس ساپارىنىڭ بارىسىندا كوكتەمگى سۋ تاسقىنىندا ۇيلەرى بۇزىلىپ، جاڭا باسپانا العان اۋىل تۇرعىندارىمەن كەزدەستى، دەپ حابارلادى وبلىس اكىمىنىڭ باسپا ءسوز قىزمەتىنەن.

«نۇرا اۋدانىندا تابيعي اپات سالدارىنان 77 ءۇي زارداپ شەكتى، ساراپشىلىق كوميسسيا سونىڭ 27 سىن (29 پاتەر) اپاتتى جانە تۇرۋعا جارامسىز دەپ تانىدى. بۇل ۇيلەر قۇلاتىلىپ، تۇرعان جەرلەرىندە جاڭا ۇيلەر سالىندى. قۇرىلىس كەرتىندى، تاسسۋات، كوبەتەي، مايوروۆكا جانە شەرباكوۆسكي اۋىلدارىندا جۇرگىزىلدى. بۇگىندە بارلىق ۇيلەر كەستەگە سايكەس تاپسىرىلعان»، - دەلىنگەن حابارلامادا.

قۇرىلىسقا 195,4 ميلليون تەڭگە بيۋدجەتتىك قاراجات جۇمسالعان.

بۇدان باسقا، زارداپ شەككەن اۋدان تۇرعىندارىنا جوعالتقان مۇلىگى ءۇشىن جالپى سوماسى 19,9 ميلليون تەڭگەگە وتەماقى تولەندى. سونداي- اق گۋمانيتارلىق كومەك كورسەتىلگەن.