نازاربايەۆ ۋنيۆەرسيتەتىنىڭ جاس عالىمى بۇعان دەيىن بەيمالىم ادام ءتۇرىن اشۋعا قاتىستى
قازاقستانعا قايتىپ ورالعان ول بۇگىن ب ا ق وكىلدەرىنە سۇحبات بەردى.
ونىڭ اتاپ وتۋىنشە، وتكەن جىلى وڭتۇستىك افريكادا «جاڭا تۋىپ كەلە جاتقان جۇلدىز» دەپ اتالاتىن ۇڭگىردەن ەجەلگى ادامنىڭ بەلگىسىز ءتۇرىنىڭ سۇيەكتەرى تابىلعان. وندا بالالاردان باستاپ قارتتارعا دەيىنگى 15 ينديۆيدۋۋمعا تيەسىلى 1500 دەن استام سۇيەكتەر تابىلعان. تابىلعان سۇيەكتەردى زەرتتەۋشى لي بەرگەر اعىمداعى جىلدىڭ كوكتەمىندە فراگمەنتتەردى تەرەڭىرەك زەرتتەپ، تالداۋ ءۇشىن «جاڭا تۋىپ كەلە جاتقان جۇلدىز» دەپ اتالاتىن سەمينارعا جاس عالىمداردى شاقىرعان. وسى حابارلاندىرۋدى كورىپ، تۇيىندەمەسىن جىبەرگەن ز. كوفمان اراعا ءبىراز ۋاقىت سالىپ، زەرتتەۋشىلەردىڭ ساپىنا قوسىلعان.
«مەن ادامنىڭ ءوسۋى مەن دامۋىن زەرتتەۋمەن اينالىسقاندىقتان، ادام سۇيەگىنىڭ بارلىق بولىكتەرىمەن جۇمىس ىستەۋگە تۋرا كەلدى. ءبىرىنشى كۇنى زەرتحانانى ارالاپ، تابىلعان سۇيەكتەردى قاراپ ءجۇرىپ مۇندايدى ەشكىم ءالى كورمەگەنىنە كوزىم جەتتى. باس سۇيەگى تىك جۇرەتىن ادامدىكى سياقتى، الايدا ولشەمى جاعىنان وتە شاعىن. Homo naledi دىڭ قايتا قالپىنا كەلتىرىلگەن ميىنىڭ ولشەمى قازىرگى زامانعى ادام ميىنىڭ شامامەن ۇشتەن ءبىرىن قۇرايدى»، - دەدى ول.
ونىڭ سوزىنە قاراعاندا تابىلعان سۇيەكتەردىڭ كەيبىرى اۆسترالوپيتەكتەردىڭ، ال كەيبىر بولىكتەرى قازىرگى ادامنىڭ سۇيەكتەرىنە ۇقسايدى.
«ءبىر ايعا سوزىلعان زەرتتەۋدىڭ بارىسىندا مەن نەگىزىندە جەتكىنشەكتىڭ جامباس سۇيەكتەرىمەن جۇمىس ىستەدىم. سونىمەن قاتار تىستەر مەن سۇيەكتەردىڭ كوپتەگەن ۇلگىلەرىنە كومىلگەن ينديۆيدتەر سانىن انىقتاۋعا تىرىستىم. ناتيجەسىندە ءبىز Dianaledi كامەراسىندا 15 ينديۆيد بولدى دەگەن تۇجىرىمعا كەلدىك»، - دەدى ز. كوفران.
