مۇسىلمان قاۋىمى اسىعا كۇتكەن كوكشەتاۋداعى جاڭا مەشىت پايدالانۋعا بەرىلدى - فوتو

 كوكشەتاۋ. قازاقپارات - بۇگىن اقمولا وبلىسىنىڭ اكىمى سەرگەي كۋلاگين مەن قازاقستان مۇسىلماندارى ءدىني باسقارماسىنىڭ ءتوراعاسى، باس ءمۇفتي ەرجان قاجى مالعاجى ۇلىنىڭ قاتىسۋىمەن كوكشەتاۋداعى جاڭادان سالىنعان مەشىتتى اشۋ سالتاناتىنا ءوتتى،

 دەپ حابارلايدى «قازاقپارات» ح ا ا- ءنىڭ ءتىلشىسى.

ەسكە سالا كەتسەك، قالا تۇرعىندارى مەن جەرگىلىكتى مۇسىلمانداردىڭ رۋحاني جانە ءدىني ورتالىعىنا اينالاتىن جاڭا مەشىت سالۋ وسىدان 5-6 جىل بۇرىن قولعا الىنعان بولاتىن. العاشقى جىلدارى قارقىندى باستالعان قۇرىلىس جۇمىستارى كەيىن قارجى تاپشىلىعىنان ءسال باياۋلاپ قالعان ەدى. سوڭعى بىرەر جىلدا وبلىستىق اكىمدىكتىڭ قولداۋىمەن قارجى ماسەلەسى وڭ شەشىلىپ، اقمولالىقتار تاعاتسىزدانا كۇتكەن مەشىت بۇگىن ەسىگىن ايقارا اشىپ وتىر.

مەشىتتىڭ اشىلۋ سالتاناتىنا قاتىسقان وبلىس اكىمى سەرگەي كۋلاگين مەن باس ءمۇفتي ەرجان قاجى مالعاجى ۇلى بارشا مۇسىلمان قاۋىمىن وسىناۋ ورتاق قۋانىشىمەن قۇتتىقتادى.

 اقمولا وبلىستىق تاريحي- مادەني مۇرا قورىنىڭ تاپسىرىسى بويىنشا بوي كوتەرگەن مەشىتتىڭ قۇنى - جوبا بويىنشا 1,4 ميلليارد تەڭگە. قارجى كوزى نەگىزىنەن وبلىستىق تاريحي- مادەني مۇرا قورىنا تۇسكەن اقشا مەن حالىقتىڭ بەرگەن ساداقاسى ەسەبىنەن ءبولىندى. قۇرىلىس جۇمىستارىن جۇرگىزگەن باس مەردىگەر - «كوكشە- ماستەر» ج ش س.

ءدىني عيماراتتا ءبىر مەزەتتە 1200 جۋىق ادام ناماز وقي الادى. مەشىتتىڭ 4 مۇناراسىنىڭ ءاربىرىنىڭ بيىكتىگى 25 مەتردى قۇرايدى. شاتىردىڭ ساۋلەتى كلاسسيكالىق ۇلگىدەگى كوپ دەڭگەيلى كۇردەلى قۇرىلىس. شاتىرىندا ءتۇرلى دەڭگەيدەگى 2 باس كۇمبەز جانە 15 كىشى كۇمبەزدەر ورناتىلعان. تاماشا ساۋلەت كەشەنىنىڭ ەڭ كوز تارتار تۇسى - ول وزىندىك ساۋلەت ءستيلى مەن عيماراتتىڭ سىرتىن ازەربايجان ەلىنەن الدىرتقان «اگلاي» تاسىمەن قاپتالعانىندا دەۋگە بولادى. مەشىتكە «ناۋان حازىرەت مەشىتى» اتاۋى بەرىلىپ وتىر.

سونداي- اق، مەشىتتە عيباداتحانالار، نەكە قيۋ ءراسىمىن وتكىزۋگە ارنالعان بولمەلەر، قۇران وقۋعا ارنالعان زالدار، مەشىت قىزمەتكەرلەرىنە ارنالعان كابينەتتەر، كىتاپحانا، جالپى سانى 350 ادامعا ارنالعان اسحاناسى دا بار.

 اۆتور: اسلان وسپانوۆ