تەحاستا قازاق ەميگرانتتارى سالعان قازاق مەكتەبى كوپشىلىكتى تاڭ قالدىردى
بۇل تۋرالى esquire.kz كە سىلتەمە جاساپ NUR. KZ حابارلايدى.
تامىزدىڭ سوڭعى جەكسەنبىسىندە تەحاستاعى قازاق مەكتەبىنىڭ اشىلۋىندا بولىپ قايتقان جۋرناليست ونداعى قاراپايىم قازاقتاردى كورىپ تاڭ قالعان.
«مەكتەپكە جەتكەندە كيىز ءۇيدى ەمەس، كادىمگى امەريكالىق ستيلدەگى ەكى قاباتتى جەكەجايدى كوردىك. ەسىگىن اشىپ، كوپتەگەن ۇلكەن- كىشى اياق-كيىمدەردى كورگەندە، ۇيىمە توپىرلاپ قوناقتار كەلگەندەگى ءسات ەسىمە ءتۇسىپ كەتتى. «ۇستاي المايسىڭ، ۇستاي المايسىڭ» دەپ جۇگىرىپ جۇرگەن قازاق بالالارىنىڭ داۋىسى قۇلاعىما جەتكەندە، تاپ ءبىر قازاق جەرىندە جۇرگەندەي سەزىمدە بولدىم»، - دەيدى جۋرناليست.
جۋرناليستىڭ الدىنان مەرۋەرت ەسىمدى ايەل شىعىپ، مەكتەپتى موڭعوليادان كەلگەن بىرنەشە قازاق وتباسىلارى اشقاندارىن ايتىپ بەرگەن.
مەكتەپتىڭ جۇمىس ىستەپ جاتقانىنا ءۇش جىل بولعان ەكەن. وندا وقيتىنداردىڭ دەنى اتا- انالارىمەن تەحاسقا ۋاقىتشا كوشىپ كەلگەن وقۋشىلار.
«ءار جەكسەنبى سايىن بالالار قازاق ءتىلىن، ادەبيەتىن وقىپ، دومبىرا مەن ۇلتتىق بيلەردى ۇيرەنگەنشە اتا- انالارى شاي ءىشىپ، كۇتىپ وتىرادى. مەكتەپ اقشا تابۋدى كوزدەيدى دەپ ايتا المايسىڭ. اقىسى بار- جوعى ماۋسىمىنا 100 دوللار. ونىڭ ىشىنە كىتاپتار، جەكەجايدى جالداۋ، وقىتۋ دا كىرەدى. مۇندا قىزمەت ەتەتىندەردىڭ دەنى ءوز ءداستۇرىن وزگە ەلدە ساقتاۋعا ۇلەسىن قوسۋعا ءازىر ەرىكتىلەر»، - دەيدى اۆتور.
مەكتەپ باسشىلىعىنىڭ ايتۋىنشا، ولار قازاقستان ەلشىلىگىنەن كىتاپتار سىيعا تارتۋ سياقتى ازىن- اۋلاق كومەك سۇراعان. الايدا جاۋاپ سول بەتى قايتپاعان.
«مۇنداعى قازاقتار ءۇشىن وتان گەوگرافيالىق ەمەس، رۋحاني دەڭگەيدەگى ۇعىم. ولار اتا- بابادان قالعان داستۇرلەردى ساقتاپ، انا تىلىندە سويلەگەندى قۇرمەت تۇتادى»، - دەيدى اديليا.
ماقالا اۆتورى بولاشاقتا بۇل جەكسەنبىلىك مەكتەپكە امەريكالىقتار دا اعىلىپ، جۇمىسى جاندانا تۇسەتىنىنە تىلەكشى ەكەنىن جازعان.
دەرەككوز: NUR. KZ
