دوللار باعامى تاريحي رەكوردتاردى ءالى دە ورناتىپ جاتىر
بۇل كەزەكتى رەت تاريحي رەكورد بولىپ وتىر.
ءبىرىنشى ساۋدا 280 تەڭگەمەن جاسالدى. ەڭ تومەنگى باعا - 278,5 تەڭگە. ەڭ جوعارعىسى - 281 تەڭگە. ساۋدانىڭ جالپى كولەمى 51 ميلليون دوللاردان استى. ساۋداعا ۆاليۋتا نارىعىنىڭ 25 مۇشەسى قاتىستى.
ايتا كەتەيىك، تاڭعى سەسسيادا باعام 276,83 تەڭگە بولدى. ءبىراق وعان دەيىن، ناقتىراق ايتقاندا KASE قور بيرجاسىنىڭ 14 -قىركۇيەك كۇنگى كەشكى سەسسياسىندا دوللار باعامى 278,54 تەڭگەگە دەيىن ءوستى. بۇعان دەيىنگى رەكورد 276,75 تەڭگە بولعان ەدى.
ال بۇعان دەيىن استانادا اقشا ايىرباستاۋ پۋنكتتەرىنىڭ جۇمىسىن جاپپاي توقتاتىپ جاتقانى بەلگىلى بولدى. «مۇنداي قىسىممەن جۇمىس ىستەۋ مۇمكىن ەمەس. ارى قاراي جۇمىس ىستەۋدىڭ ءمانى جوق. ادامدار كۇيگەلەكتەنىپ جاتىر. ۇنەمى تەكسەرىس، سوندىقتان دا قىسىم كوپ. (...) مۇندا قارا نارىق قىزۋ جۇمىس ىستەپ تۇر، ياعني زاڭسىز كەلىسىمدەر ءورشىپ تۇر. قارا نارىقتا جۇمىس ىستەۋگە كوشۋ كەرەك نەمەسە مۇلدەم جۇمىس ىستەمەگەن ءجون. ءبىز جۇمىس ىستەمەۋدى ۇيعاردىق، قالعاندارى قارا نارىقتى تاڭداپ جاتىر. باسقا جول جوق»، - دەدى "بايلىك Finance" ايىرباستاۋ پۋنكتىنىڭ يەسى ايگۇل سالىبەكوۆا.
Tengrinews.kz
