ا ق ش بۇرىن- سوڭدى بولماعان قاۋىپسىزدىك شارالارىنا كىرىستى

استانا. قازاقپارات - ا ق ش ريم پاپاسى فرانسيسك پەن الەم كوشباسشىلارىنىڭ ساپارىنا وراي ەرەكشە قاۋىپسىزدىك شارالارىن پىسىقتاپ جاتىر.

امەريكا جۇرتشىلىعىنا ارنايى ساپار جاساۋدى جوپارلاپ وتىرعان ريم پاپاسى مۇحيتتىڭ ارعى جاعىندا 22-27 - قىركۇيەك ارالىعىندا بولىپ قايتپاق. مارتەبەلى قوناقتىڭ ا ق ش- قا تابان تىرەۋى نيۋ- يوركتە وتەتىن ب ۇ ۇ باس اسسامبلەياسىنىڭ 70 جىلدىق مەرەيتويى قارساڭىندا جۇزەگە اسپاق. ۇيىمنىڭ شتاب- پاتەرىندە وتەتىن اۋقىمدى شاراعا 170 ەلدىڭ مەملەكەت باسشىلارى قاتىسادى. ياعني نيۋ- يورك شاھارى ءبىر مەزەتتە الەم كوشباسشىلارىنىڭ %90  ىن قارسى الماق. قالالىق پوليتسيا دەپارتامەنتىنىڭ كوميسسارى بيلل براتتوننىڭ مالىمدەۋىنشە، قۇقىق قورعاۋ قىزمەتى قازىردەن باستاپ قانداي دا ءبىر توتەنشە جاعدايدىڭ الدىن الۋعا ساقاداي ساي. دەسە دە نيۋ- يورك بۇرىن- سوڭدى مۇنداي كولەمدەگى قاۋىپسىزدىك شارالارىن قولعا الىپ كورمەپتى. بۇل جولى جەرگىلىكتى پوليتسياعا قۇپيا قىزمەت، فەدەرالدى تەرگەۋ بيۋروسى جانە تاعى باسقا كۇشتىك قۇرىلىمداردان تۇراتىن 50 گە جۋىق اگەنتتىك قولعابىس ەتپەك.

 اۆتورى: جىگەر سارسەن

www.24.kz