پرەمەر - ورىس تىلىندە بايانداما جاساعان مينيسترلەرگە ەسكەرتۋ جاسادى

استانا. قازاقپارات - قىرعىزستان پرەمەر-ءمينيسترى تەمىر ساريەۆ قىرعىز ۇكىمەتىنىڭ كەزەكتى وتىرىسىندا رەسەيدىڭ مەملەكەتتىك تىلىندە بايانداما جاساعان مينيسترلەرگە ەسكەرتۋ جاساپ، سوگىس ايتقان.

بۇل تۋرالى «قامشى» پورتالى kyrtag.kg اگەنتتىگىنە سىلتەمە جاساي وتىرىپ حابارلايدى.

كەزەكتى وتىرىستا ەل پرەمەر-ءمينيسترى تەمىر سارنيەۆ ورىس تىلىندە بايانداما جاساعان مينيسترلەرگە ەسكەرتۋ جاساپ، سوگىس جاريالاعان.

ۇكىمەت وتىرىسىندا بارلىعى ءۇش ماسەلە قارالعان. ءبىرىنشى بولىپ، قىرعىزستاننىڭ ەكونوميكا ءمينيسترى ولەگ پانكراتوۆ ءبىرىنشى جارتى جىلدىقتىڭ قورىتىندى ەسەبىن بەرگەن. ادەتتەگىدەي بايانداما ورىس تىلىندە جاسالعان.

ەكىنشى بولىپ ءسوز العان قىرعىزستان قورعانىس ءمينيسترى ابيبيللا قۋدايبەرديەۆ تە ءوز بايانداماسىن كەڭەستىڭ تىلىندە جاساعان. ءۇشىنشى ماسەلە بويىنشا ءسوز كەزەگى قىرعىزستان ادىلەت ءمينيسترى جىلدىز مامبەتاليەۆكە تيگەندە، مينيستر حانىم دا ءوز بايانداماسىن جاساۋ ءۇشىن رەسەيدىڭ مەملەكەتتىك تىلىنە جۇگىنگەن.

بۇعان شامدانعان پرەمەر-مينيستر تەمىر ساريەۆ مينيسترلەرگە ەسكەرتۋ جاساعان.

«قاراڭىزدارشى، بارلىق ءۇش بايانداما دا ورىس تىلىندە جاسالدى. بارلىقتارىڭىز قىرعىز ءتىلىن جاقسى بىلەسىزدەر. بۇل نە سوندا؟»، - دەدى تەمىر ساريەۆ مىرزا.

NUR. KZ