14:10, 13 - قىركۇيەك 2015 | GMT +5
بۇلىكشى گەنەرالدىڭ جاقتاستارى جان- جاقتان قورشاۋعا الىندى
استانا. قازاقپارات - تاجىكستاننىڭ شىعىسىندا بۇلىكشى گەنەرالدىڭ جاقتاستارىن جويۋ وپەراتسياسى جالعاسۋدا.
ەلگە قاۋىپ توندىرگەندەرگە قارسى امال- ارەكەتتەر ەل استاناسىنان 50 شاقىرىم جەردەگى راميت تاۋ شاتقالىندا جۇرگىزىلىپ جاتىر. ەرتەڭ ۇجىمدىق قاۋىپسىزدىك كەلىسىمشارت ۇيىمىنا مۇشە مەملەكەتتەر - قازاقستان، ارمەنيا، بەلارۋس، قىرعىزستان جانە رەسەي فەدەراتسياسىنىڭ باسشىلارى دۋشانبەدە باس قوسۋى ءتيىس. جەرگىلىكتى بيلىك وكىلدەرى ارنايى وپەراتسيانىڭ اتالعان جيىن باستالعانعا دەيىن اياقتالاتىنىنا سەنىمدى. قولدا بار مالىمەتتەرگە قاراعاندا، شابۋىلداردى ۇيىمداستىرعان نازارزودانىڭ 110 جاقتاسى ۇستالىپ، 27 كوتەرىلىسشىنىڭ كوزى جويىلعان. ەستەرىڭىزدە بولسا، وتكەن اپتادا تاجىكستاندا قورعانىس ءمينيسترىنىڭ ورىنباسارى قىزمەتىن اتقارىپ كەلگەن گەنەرال ءابدۋحاليم نازارزودانىڭ ءبىر توپ بۇلىكشىسى شامامەن 40 ادامدى قىرىپ سالعان بولاتىن.
