قازاق حاندارىنىڭ ۇلتقا سىڭىرگەن ۇشان- تەڭىز ەڭبەگى ءاردايىم ەل ەسىندە ساقتالادى - ن. نازاربايەۆ
بۇل تۋرالى بۇگىن استاناداعى تاۋەلسىزدىك سارايىندا قازاق حاندىعىنىڭ 550 جىلدىعىنا ارنالعان سالتاناتتى جيىندا ەلباسى نۇرسۇلتان نازاربايەۆ ءمالىم ەتتى.
«قازاق حاندىعى كەزەڭى - ات جالىندا كۇن كەشكەن الاش جۇرتىنىڭ قاھارماندىق ءداۋىرى ەدى. ەل بيلەگەن حانداردىڭ ءومىرى مايدان شەبىندە ءوتتى. قازاقتىڭ العاشقى 14 حانىنىڭ جەتەۋى جورىق جولىندا قازا تاپتى. وسىناۋ ۇلى بابالاردىڭ بيىك رۋحىنا بارلىق ۇرپاق ايرىقشا قۇرمەتپەن باس ءيىپ، ريزاشىلىعىن بىلدىرەدى»، - دەدى پرەزيدەنت.
بۇل تۇرعىدا ەلباسى حانداردىڭ ۇلتقا سىڭىرگەن ۇشان- تەڭىز ەڭبەگى ءاردايىم ەل ەسىندە ساقتالاتىندىعىن قاداپ ايتتى.
«بىرلىكتىڭ قادىرىن ءبىلىپ، بىلەككە بىلەك قوسقاندا اتامەكەندى جاۋدان ازات ەتتىك. الايدا، اعايىننىڭ ارازدىعى، ىنتىماعىنىڭ ازدىعىنان قازاق حاندىعى جويىلدى. دانىشپان اباي ايتقانداي: «باس- باسىنا بي بولعان وڭكەي قيقىم، مىنەكي، بۇزعان جوق پا، ەلدىڭ سيقىن» دەمەكشى، سول كەزدە بۇكىل دۇنيەءجۇزىن جايلاعان «ءبولىپ ال دا، بيلەي بەر» اتتى وتارشىلىققا نەگىزدەلگەن سۇرقيا ساياسات قازاق ەلىن ءبىرجولاتا رەسەي پاتشالىعىنىڭ وتارىنا اينالدىردى»، - دەدى مەملەكەت باسشىسى.
وسى ورايدا ن. نازاربايەۆ سول كەزدەرى ەلىمىز قانشا قيىندىق كورسە دە، ازاتتىق اڭساعان ءورشىل رۋحى مەن ۇلتتىق كەلبەتىن ەشقاشان جوعالتپاعاندىعىن قاداپ ايتتى.
«ابىلايدىڭ اسىل ارماندارى تاۋەلسىزدىك تۇسىندا تۇگەل ورىندالدى دەپ ايتا الامىز»، - دەدى مەملەكەت باسشىسى.
اۆتور: رۋسلان عابباسوۆ
