قازاقستان سان الۋان ۇلت پەن ۇلىستى كوك تۋدىڭ استىنا جيىپ، بەرەكەسىن ساقتاعان ەلگە اينالدى - ن. نازاربايەۆ
«ەكى جارىم عاسىر پاتشالىق رەسەي مەن 70 جىلدان استام كەڭەس وداعىنىڭ قۇرامىندا بولعان تۇستا قازاق حالقى ءوز جەرىندە وتىرىپ، ازشىلىققا، ال قازاقستان ءوز ەركىنەن تىس 130 ۇلت پەن ۇلىستىڭ مەكەنىنە اينالدى. الەم تاريحىنا كوز تىگەر بولساق، سوعىس اتاۋلى نەدەن باستالادى؟ بىرىنشىدەن، جەر داۋىنان، ەكىنشىدەن ءبىر ۇلتتىڭ ەكىنشى ۇلتتان ارتىقشىلىق ەتۋىنەن نەمەسە ءدىن ۇستەمدىگىنەن بولاتىندىعىن بايقاۋ قيىن ەمەس. ءبىز ەلىمىزدى مەكەندەگەن سان الۋان ۇلت پەن ۇلىس، ءدىن وكىلدەرىن كوك تۋدىڭ استىنا جيىپ، بەرەكە مەن بىرلىكتى ساقتادىق»، - دەدى ەلباسى.
پرەزيدەنت وتكەن جىلدار ىشىندە ب ۇ ۇ الەمدەگى تالاي مەملەكەتكە ۇلگى- ونەگە رەتىندە ۇسىنعان قازاقستان حالقى اسسامبلەياسى قۇرىلعانىن، بەس رەت قاتارىنان الەمدىك جانە ءداستۇرلى دىندەر باسشىلارىنىڭ سيەزى زور تابىسپەن وتكەنىن ءمالىم ەتتى.
«ءبىز ىرگەمىزدى بەكىتىپ، ەلدىگىمىزدى بەكەمدەگەن سوڭ الەمدەگى ەڭ دامىعان ەلدەردىڭ تاجىريبەسىن زەرتتەپ، دامۋدىڭ ءوزىمىز جاساعان «قازاقستاندىق مودەلىن» ۇسىندىق. دامۋدىڭ ەڭ جارقىن بولاشاعىن ايقىنداعان «قازاقستان-2050» ستراتەگياسىن تۇزدىك. ءدال وسى قۇجاتتىڭ نەگىزىندە العا قويعان ماقساتىمىزدى رەت- رەتىمەن جۇزەگە اسىرىپ، قۋاتتى دا تابىستى مەملەكەت ورناتتىق. سونىڭ ناتيجەسىندە ەكونوميكامىز از عانا جىلدا ەشقاشان ەشكىمدە بولماعان قارقىنمەن العا باستى.
2014 - جىلى ەلىمىزدىڭ جالپى ىشكى ءونىمى 1993 - جىلعى كورسەتكىشتەن 19 ەسەگە ارتىپ، جان باسىنا شاققاندا 600 دوللاردان 13 مىڭ دوللارعا جەتىپ، شىعىس ەۋروپا، تۇركيا، مالايزيا سەكىلدى ءوزىمىز ونەگە تۇتقان ەلدەردەن باسىپ وزدىق. 1993-2013 - جىلدار ارالىعىندا 200 ميلليارد دوللاردان استام تىكەلەي شەتەل ينۆەستيتسياسىن تارتتىق. ەلدىڭ ءال- اۋقاتى بارىنشا جاقسارىپ، وركەنيەتتى ەلدەردىڭ دەڭگەيىنە جەتتى»، - دەدى ن. نازاربايەۆ.
اۆتور: قانات مامەتقازى ۇلى
