الەمدەگى ەڭ بەلسەندى ساياحاتشىلار - قىتايلىقتار

وتكەن جىلى قىتايلىق تۋريستەر شەت مەملەكەتتەرگە 165 ميلليارد دوللارىن قالدىرىپ كەتكەن. وسى ەلدەگى ءتۋريزمدى زەرتتەۋ ينستيتۋتىنىڭ مالىمەتىنە سايكەس، بيىل دا سىرتقا ساياحاتتايتىن قىتايلىقتاردىڭ سانى بىلتىرعىمەن سالىستىرعاندا %16 عا ارتىق بولادى دەپ بولجانۋدا. بيىل بىرنەشە مەملەكەتتە قىتايدىڭ تۋريزم جىلى ءوتىپ جاتىر.

ماسەلەن ءۇندىستان مەن وڭتۇستىك كورەيا، ورتالىق جانە شىعىس ەۋروپانىڭ ءبىرقاتار ەلدەرى «جىبەك جولىن» جاڭعىرتۋ اياسىندا تۋريستىك ارىپتەستىكتى دامىتۋ ءۇشىن ءوزارا «تۋريزم جىلىن» جاريالادى. سوعان سايكەس بۇل مەملەكەتتەرگە قىدىرىپ بارعان قىتايلىقتاردىڭ سانى كۇرت ارتقان. جەلىپ ءجۇرىپ، جەر تانىسام دەگەندەر ءۇشىن يۋاننىڭ قۇنسىزدانۋى دا كەدەرگى كەلتىرگەن جوق.

چەن شينلۋ، تۋريست:

- مەن امەريكاعا بارعالى وتىرمىن. كيىم كەشەك، ەشتەڭە ساتىپ المايمىن، DutyFree-داعى زاتتار دا ماڭىزدى ەمەس. ويتكەنى مەن دەمالۋعا بارامىن.

گۋو جيحاو، تۋريست:

- شەتەلدەن الاتىن زاتتارىم ماعان ءبارىبىر ارزانعا شىعايىن دەپ تۇر. اقشا قۇنسىزداندى ەكەن دەپ جوسپارىمدى وزگەرتپەيمىن.

جەرگىلىكتى تۋروپەراتورلار يۋاننىڭ قۇنسىزدانۋى جولداما باعاسىنا اسەر ەتكەنىن جاسىرمايدى. ساياحاتتاۋشىلارعا بيلەت ساتۋمەن اينالىساتىن ءىرى ينتەرنەت اگەنتتىك جولداما باعاسى شامامەن 100-200 رەنمينبيگە قىمباتتاعانىن ايتادى. بۇل تەڭگەگە شاققاندا شامامەن 3800-7000 تەڭگەگە دەيىن ءوستى دەگەن ءسوز.

ليۋ بەي، تۋريستىك كومپانيانىڭ ۆيتسە- پرەزيدەنتى:

- شەتەلگە شىعاتىن تۋريستەر سانى جىلدان جىلعا ارتىپ كەلە جاتقاندىقتان ءبىز جەرگىلىكتى تۋروپەراتورلارمەن ءوزارا ءتيىمدى كەلىسىم- شارتتارعا وتىردىق. ءىرى اگەنتتىكتەر وزدەرىنىڭ كوپتەن بەرى جۇمىس ىستەپ كەلە جاتقان سەنىمدى ارىپتەستەرىمەن يۋان مەن دوللار كۋرسى وزگەرمەي تۇرىپ كەلىسىم- شارتقا وتىرعان. سوندىقتان ەشكىم جەلىنبەيدى، ەكى جاققا دا ءتيىمدى.

بىلتىر بۇل ەلدەن ا ق ش-قا 2 ميلليون تۋريست بارعان. وتكەن جىلى قاراشادا قىتايلىق تۋريستەر ءۇشىن ۆيزانى ون جىلعا سوزعاننان كەيىن ولاردىڭ سانى ءتىپتى ارتىپ كەلەدى. ءبىر سوزبەن ايتقاندا باسقا ەلگە بارادى، بىرەۋدىڭ ەكونوميكاسىن اقشالارىن سالادى. سوندىقتان بيلىك ىشكى تۋريزمدى دامىتۋدى قولعا الدى. ءتىپتى جۇمىس كۇنىن ءتورت تاۋلىككە دەيىن قىسقارتۋ تۋرالى باستاما جاسالدى. بىلتىر قىتايدان الەمدى ارالاۋعا 110 ميلليون تۋريست سىرتقا شىعىپ، شەت ەلدەرگە 165 ميلليارد دوللارىن قالدىرىپ كەتكەن. بيىل دا شارتاراپتى شارلاۋدا قىتايلىق ساياحاتتاۋشىلار دۇنيەجۇزىندە ءبىرىنشى ورىننان كورىنبەك. استانادا وتەتىن EXPO كورمەسىنە كورشى ەلدىڭ تۋريستەرى كوپ كەلەدى دەپ ءۇمىت ارتۋىمىز بەكەر ەمەس. 2017 قىتايداعى قازاقستان جىلى دەپ جاريالانعان.

www.24.kz