استانادا قىمىزمۇرىندىق مەرەكەسى اتالىپ وتىلەدى
«قىمىزمۇرىندىق» دەپ اتالاتىن شارا ەرتەڭ، 11 -قىركۇيەكتە «اتامەكەن» ەتنو-مەموريالدىق كەشەنىندە ۇيىمداستىرىلادى، دەپ حابارلادى astana.gov.kz.
مەرەكەگە نيەت بىلدىرگەن جانداردىڭ بارلىعى قاتىسا الادى. استانا تۇرعىندارى مەن قوناقتارى ءۇشىن 2 كيىز ءۇي تىگىلىپ، ۇلتتىق كيىم كيگەن قىزدار قىمىز، ىستىق باۋىرساق پەن باسقا دا قازاقتىڭ ۇلتتىق تاعامدارىن ۇسىناتىن بولادى. اتا-بابامىزدان قالعان «تۇساۋكەسەر» سالت-جوراسى ەرەكشە قازاقي اتموسفەرا ورناتپاق.
كەشەن اۋماعىندا التىباقان ورناتىلىپ، ءارالۋان ۇلتتىق كيىم تۇرلەرى كوپشىلىك نازارىنا ۇسىنىلادى. بۇدان باسقا، مال شارۋاشىلىعىمەن اينالىسقان ەجەلگى تايپالاردىڭ ونەرى نەگىزىندە قالىپتاسقان قازاقتىڭ ويۋلارىمەن ورنەكتەلگەن تۇيە جۇنىنەن جاسالعان تابيعي كىلەمدەر كورمەسى ادامداردىڭ قىزىعۋشىلىعىن وياتپاق. سونىمەن قاتار، «قىمىزمۇرىندىق» مەرەكەسىندە بۇركىتشىلەر دە ءوز شەبەرلىكتەرىن ورتاعا سالاتىن بولادى. كەلۋشىلەر قازاقتىڭ ۇلتتىق سۋسىنى تۋرالى تەاترلاندىرىلعان قويىلىمدى تاماشالايدى.
مەرەكە قوناقتارى ارقان تارتۋ جانە ارمرەستلينگ سىندى جارىستاردا كۇش سىناسادى. سونداي-اق، قالا تۇرعىندارى قىمىز ءىشۋ سايىسىنا قاتىسىپ، اتالعان سۋسىن تۋرالى بىلىمدەرىن ورتاعا سالادى.
ساعات 11:00-18:00 دەيىن جالعاساتىن مەرەكەگە كەلۋشىلەر قىمىزدان ءدام تاتىپ، قازاقتىڭ ۇلتتىق سۋسىنىنىڭ تاريحىمەن تانىسادى.
