قىتايدا سوتتى بولعان اقجارقىن تۇرلىباي ۇكىم كۇشىنە ەنگەن كەزدە قازاقستانعا ەكستراديتسيالاۋ تۋرالى ءوتىنىش بەرە الادى - باس پروكۋراتۋرا
بۇل تۋرالى بۇگىن سەناتتىڭ جالپى وتىرىسىنان كەيىن جۋرناليستەرگە بەرگەن سۇحباتىندا ق ر باس پروكۋرورىنىڭ ورىنباسارى جاقىپ اسانوۆ مالىمدەدى.
«قازاقستاننىڭ ازاماتشاسىنا قاتىستى قىتاي سوتىنىڭ ۇكىمى ءبىزدىڭ بىلۋىمىزشە، ءالى كۇشىنە ەنە قويعان جوق، قورعاۋشىلار جوعارى ينستانتسياعا شاعىمدانىپ جاتىر. ال ول ۇكىم كۇشىنە ەنگەن كەزدەن باستاپ، قازاقستان ازاماتشاسى رەتىندە ول ءبىزدىڭ باس پروكۋراتۋراعا نەمەسە قىتايلىق تاراپقا ءوزىنىڭ جازاسىن وتەۋ مەرزىمىن قازاقستانعا الماستىرۋدى سۇراي الادى. بۇل ونىڭ زاڭدى قۇقىعى، سونىڭ ىشىندە قازاقستان مەن قىتاي اراسىندا سوتتالعان تۇلعالاردى بەرۋ تۋرالى كەلىسىمشارت 2011 - جىلى جاسالعان بولاتىن»، - دەدى جاقىپ اسانوۆ.
ونىڭ سوزىنە قاراعاندا، قىتايدا سوتتى بولعان قازاقستان ازاماتشاسىن ەكستراديسيالاۋ مۇمكىندىگى 1-2 جىلدىڭ توڭىرەگىندە ءوربۋى ىقتيمال. دەگەنمەن، ماسەلەنىڭ ءبارى قىتاي جوعارى سوت ورىندارىنىڭ شاعىم بويىنشا ءىستى قانشالىقتى تەزىرەك قاراۋىنا بايلانىستى بولىپ تۇرعان كورىنەدى.
«ءبىزدىڭ قىلمىستىق كودەكس بويىنشا دا وسىنداي قىلمىسى ءۇشىن قاتاڭ قىلمىستىق جاۋاپكەرشىلىك قاراستىرىلعان. ەگەر ءىستى قازاقستاندىق سوت قارايتىن بولسا دا، جازا جەڭىل بولمايدى»، - دەدى باس پروكۋرور ورىنباسارى جۋرناليستەر ساۋالىنا جاۋاپ بەرە وتىرىپ.
ەستەرىڭىزگە سالا كەتەيىك، 20 جاستاعى قازاق قىزى اقجارقىن تۇرلىباي 2014 - جىلدىڭ ناۋرىز ايىندا قىتايدىڭ مالايزيامەن شەكاراسىندا ەسىرتكىمەن ۇستالعان بولاتىن. ونىڭ جۇك سومكەسىنەن 4,5 كەلى ەسىرتكى تابىلىپ، اقجارقىن بۇل تۋرالى بىلمەيتىنىن مالىمدەگەن. وسى ءىس بويىنشا قىتايدىڭ گۋاڭجوۋ سوتى اقجارقىن تۇرلىبايدى ەسىرتكى كونترابانداسىمەن ايىپتاپ، ءومىر بويىنا باس بوستاندىعىنان ايىردى.
قازاقستان تاراپى بولسا ءوز ازاماتشاسىن ەكستراديتسيالاۋعا بار كۇشىن سالاتىنى دا ايتىلعان ەدى.
اۆتور: قانات مامەتقازى ۇلى
