قىتايدىڭ شيان قالاسىنان شىققان تۇيەلى كەرۋەن جامبىل وبلىسىنىڭ شەكاراسىنا تاياپ قالدى - فوتو

تاراز. قازاقپارات - جامبىلدىقتار قىتايدىڭ شانشي پروۆينتسياسى شيان قالاسىنان جىبەك جولىنىڭ ىزىمەن تاراز قالاسىنا كەلە جاتقان تۇيەلى كەرۋەندى كۇتىپ الۋعا دايىندىق ۇستىندە.

 ەسكە سالا كەتەيىك، 2014 - جىلدىڭ 19 - قىركۇيەگىندە قىتايدىڭ شانشي پروۆينتسياسى شيان قالاسىنان كونە جىبەك جولىنىڭ ىزىمەن «قىتاي - قازاقستان: ۇلى جىبەك جولىنىڭ شاي مادەنيەتى» اتتى دوستىق جانە ىنتىماقتاستىق كەرۋەنى تاراز قالاسىنا قاراي جولعا شىققان بولاتىن. بۇل ءىرى اكسيا ق ح ر ءتوراعاسى شي جينپيڭنىڭ جىبەك جولى ەكونوميكالىق بەلدەۋىن قۇرۋ تۋرالى باستاماسىن قولداۋ ماقساتىندا قولعا الىنعان.

150 تۇيەسى بار كەرۋەن 8 - قازان كۇنى - قازاق حاندىعىنىڭ 550 جىلدىعى مەرەكەسى قارساڭىندا تاراز قالاسىنا كەلىپ جەتۋى ءتيىس.

جامبىل وبلىسى اكىمدىگىنىڭ حابارلاۋىنشا، قىركۇيەكتىڭ 20 سىنا قاراي قورداي اۋدانى قورداي اۋىلىندا كەرۋەندى كۇتىپ الۋ ءۇشىن سالتاناتتى شارا ۇيىمداستىرىلىپ، مەرەكەلىك شارالار مەن كونفەرەنسيالار وتكىزىلەدى.

«كۇنىنە 25 شاقىرىم جۇرەمىز. كەرۋەنگە قاتىسۋشىلاردىڭ كوڭىل كۇيلەرى جاقسى. ەلدى مەكەندەردەگى تۇرعىندار ىستىق ىقىلاسپەن قارسى الىپ جاتىر. شامامەن 22-23 - قىركۇيەكتە كەرۋەن جامبىل وبلىسىنا جەتەدى»، - دەپ قازاقپارات تىلشىسىنە تەلەفون ارقىلى الماتى وبلىستىق كاسىپكەرلەر پالاتاسىنىڭ وكىلى زارينا جانسەركەيەۆا.

ايتا كەتەيىك، 5 مىڭ شاقىرىم قاشىقتىقتى ءجۇرىپ ءوتۋ شاراسىن قازاقستانداعى دۇڭعان قاۋىمداستىعى مەن «ي- زە فۋتسا» (شيان، ق ح ر) كومپانياسى ۇيىمداستىرىپ وتىر.

ال، كەرۋەننىڭ قازاقستاندىق تاراپتان ۇيىمداستىرۋشىلارى الماتى وبلىسىنىڭ كاسىپكەرلەر پالاتاسى مەن «جاڭا جىبەك جولى» مادەني جانە ەكونوميكالىق حالىقارالىق اكادەمياسى بولىپ تابىلادى.