قازاقستاندا جەكە تۇلعالار تىكۇشاق ساتىپ الۋدى كوبەيتكەن
بۇل تۋرالى قازاقپارات تىلشىسىنە كومپانيانىڭ ءوندىرىس جانە كليەنتتەردى قولداۋ جونىندەگى ديرەكتورى سكوۆ حولگەر الف ءمالىم ەتتى.
«ءبىزدىڭ كومپانيامىزدىڭ نەگىزگى ميسسياسى - قازاقستاندا تىكۇشاق ءوندىرۋ قىزمەتىن جۇزەگە اسىرۋ عانا ەمەس، سونداي- اق تىكۇشاق جوندەۋ قىزمەتتەرىن ۇسىنۋ، وسى سالاعا مامانداردى وقىتۋ. ءبىزدىڭ تاعى ءبىر ماقساتىمىز - تىكۇشاق جوندەۋ قىزمەتىنىڭ ۇلەسىن ارتتىرىپ، بىلىكتى مامانداردىڭ سانىن ارتتىرۋ. سونداي- اق، تىكۇشاق ۇشقىشتارىن وقىتۋ دا باسىم باعىتىمىزدىڭ ءبىرى دەپ الدىق. سەبەبى، بولاشاقتا تىكۇشاق جوندەيتىن ماماندار مەن ۇشقىشتاردىڭ سانى تاپشى بولادى دەگەن بولجام بار. بۇل رەتتە ايتا كەتەرلىگى، قازىر ءبىز قازاقستاندا كەڭ قولدانىلاتىن «ەۋروكوپتەر-145» تىكۇشاعىن عانا ەمەس، «130»، «125» تىكۇشاقتاردى قۇراستىرادى، ولاردى جوندەيتىن مامانداردى دايارلاپ جاتىرمىز. ءبىز قازىر موڭعوليا، تۇركىمەنستان، قازاقستان نارىعىندا تىكۇشاق قۇراستىرىپ، جوندەي الامىز»، - دەيدى ول.
ال قازاقستاندا كەلەسى جىلى نەشە تىكۇشاق قۇراستىرۋ كوزدەلۋدە دەگەن سۇراققا ول: «بۇل ماسەلە تاپسىرىس بەرۋشىلەرگە بايلانىستى، ياعني، نەشە تىكۇشاققا تاپسىرىس تۇسسە جانە تاپسىرىس تۇگەلدەي قارجىلاندىرسا، ءبىز سونشا كولەمدە قۇراستىرا الامىز»، - دەپ جاۋاپ بەردى.
«بىلتىر جالپى 14 تىكۇشاق قۇراستىرىپ ساتۋ جوسپارلانعان ەدى، ءبىراق سەگىز تىكۇشاقتى پايدالانۋعا بەردىك. ءبىراق، قازاقستان نارىعىنداعى سۇرانىستى تولىق قاناعاتتاندىرامىز دەسەك، مۇناي كەن ورىندارىنا باراتىن، بولماسا، ادامداردى قۇتقارىپ، مەديتسينالىق كومەك كورسەتەتىن جانە وسىنداي وزگە دە ماقساتتا شامامەن 24 تىكۇشاق قۇراستىرۋ كەرەك. باسا ايتا كەتەرلىگى، قازىر جەكە تۇلعالاردان تۇسەتىن تاپسىرىستار پايدا بولدى. مىسالى، ءبىز وسى ۋاقىتقا دەيىن جەكە تۇلعالارعا 2 تىكۇشاق ساتتىق. قازىر باسقادا تاپسىرىس بەرۋشىلەرمەن كەلىسسوزدەر جۇرگىزىپ جاتىرمىز»، - دەدى س. حولگەر الف.
اۆتور: كەنجەكەي توقتامۇرات قىزى
