ارنايى ەكونوميكالىق ايماقتار يندۋستريالاندىرۋدىڭ ەكىنشى بەسجىلدىعىندا ءوسىم نۇكتەسىنە اينالۋى ءتيىس - ءا. يسەكەشەۆ
بۇل تۋرالى بۇگىن ءماجىلىستىڭ جالپى وتىرىسىندا ينۆەستيتسيالار جانە دامۋ ءمينيسترى اسەت يسەكەشيەۆ ءمالىم ەتتى.
ايتا كەتەيىك، جالپى وتىرىستا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ارنايى ەكونوميكالىق ايماقتاردى جەتىلدىرۋ ماسەلەلەرى بويىنشا وزگەرىستەر مەن تولىقتىرۋ ەنگىزۋ تۋرالى» زاڭ جوباسى ءبىرىنشى وقىلىمدا ماقۇلداندى.
«ەكونوميكالىق كليماتتى جاقسارتۋعا باعىتتالعان «نۇرلى جول» جاڭا ەكونوميكالىق ساياساتى اياسىندا، سونداي- اق، الەمدىك جاعىمسىز ەكونوميكالىق احۋال سالدارىنان دامۋشى ەلدەردەن ينۆەستيتسيالاردىڭ كەتۋى ىقتيمالدىعىنىڭ ارتۋىنا قاراي ارنايى ەكونوميكالىق ايماقتار قىزمەتىن جەتىلدىرۋ ماڭىزدى بولىپ تابىلادى.
سوندىقتان دا، يندۋستريالاندىرۋدىڭ ەكىنشى بەسجىلدىق كەزەڭىندە ارنايى ەكونوميكالىق ايماقتار ءوسىم نۇكتەسىنە اينالۋى ءتيىس. سونىمەن قاتار، دايىن ينفراقۇرىلىمدار ناتيجەسىندە اەا شەتەلدىك ينۆەستورلار ءۇشىن جاعىمدى حابقا اينالا ءتۇسۋى كەرەك»، - دەدى مينيستر اسەت يسەكەشيەۆ.
ونىڭ ايتۋىنشا، وسى ماقساتتا ارنايى ەكونوميكالىق ايماقتار قىزمەتىن جەتىلدىرۋ ءۇشىن ارنايى زاڭ جوباسى ازىرلەنىپ وتىر. بۇل رەتتە الەۋەتتەردى ىسكە اسىرۋ، فورمالدى كەدەرگىلەردى جويۋ، ينۆەستيتسيالار ءۇشىن ىنتالىلىق جاساۋ ارقىلى تارتىمدىلىعىن ارتتىرۋ قاراستىرىلادى.
«قۇجاتتا ەڭ بىرىنشىدەن، باسىم باعىتتاردى ايقىنداۋ شارالارى قامتىلادى. قولدانىستاعى تاجىريبە باسىم باعىتتاردى ايقىنداۋعا يكەمدى بولماي وتىرعانىن كورسەتتى. ارينە، باستاپقىدا بۇل جاقسى كورىنگەن، الايدا دامۋ اياسىندا ايماقتارداعى كلاستەرلەردە ونداي تەتىكتىڭ يكەمدىلىگىن كوتەرۋ قاجەتتىلىگى تۋىندادى»، - دەدى اسەت يسەكەشيەۆ.
ءمينيستردىڭ سوزىنە قاراعاندا، زاڭ جوباسىمەن ارنايى ەكونوميكالىق ايماقتاردا قىزمەتىن جۇزەگە اسىراتىن ۇيىمدارعا سالىق سالۋدا، سونىڭ ىشىندە جەر سالىعى، كورپوراتيۆتىك تابىس سالىعى، مۇلىك سالىعى جانە جەر ۋچاسكەلەرىن پايدالانعانى ءۇشىن تولەماقىنى ەسەپتەۋ كەزىندە قاتىسۋشىلارعا جەڭىلدىكتەر كەڭەيتىلمەك.
«ەكىنشىدەن، ينۆەستيتسيالار جانە دامۋ مينيسترلىگى بازاسىندا ارنايى ەكونوميكالىق ايماقتاردىڭ ءبىرىڭعاي ۇيلەستىرۋ ورتالىعىن قۇرۋ كوزدەلەدى. 2010 -جىلعا دەيىن اەا اكىمدىكتەرمەن باسقارىلىپ كەلدى. ال جاڭا زاڭ قابىلدانعان 2011 -جىلدان بەرى بۇل جۇمىستى ءبىز ۇيلەستىردىك. ەندىگى كۇنى ءبىرىڭعاي ستاندارتتار ەنگىزۋ ءۇشىن ۇيلەستىرۋدى ونان سايىن ناقتى قولعا الۋ قاجەتتىگى تۋىنداپ وتىر. بۇل رەتتە جوبالاردىڭ ساپاسىنا باقىلاۋ، باسقارۋدىڭ ساپالى جۇيەسىن ەنگىزۋ كوزدەلەدى» ، - دەدى اسەت يسەكەشيەۆ.
اۆتور: قانات مامەتقازى ۇلى
