قازاقتىڭ باتىرى ەلىن قورعاسا، قازاقتىڭ توبەتتەرى مالىن قورعاعان - اقىن نەسىپبەك ايت ۇلى
وسى ءبىر ۇلتىمىزدىڭ سالت- ءداستۇرىن قايتا جاڭعىرتۋ جولىنداعى بىرەگەي ءىس- شاراعا ارنايى قوناق بولىپ، تاماشالاعان اقىن، مەملەكەتتىك سىيلىقتىڭ يەگەرى نەسىپبەك ايت ۇلى قازاقتىڭ تازىسى مەن توبەتتەرىن قورعاۋ، ناسيحاتتاۋ ماقساتىندا وتكىزىلىپ وتىرعان بايقاۋدىڭ ماڭىزدىلعى تۋرالى ءوز ويىمەن ءبولىستى.
«قازاقتا «ىلگەرى باسقاننىڭ ءيتى وتتايدى» دەگەن ماقال بار. قازاقتىڭ تازىسى مەن توبەتىنىڭ قۇرىپ كەتپەۋى ءۇشىن، ايىرىقشا ءمان بەرىپ، وسىلاي ۇلكەن مەرەكە وتكىزىپ، بايقاۋ ۇيىمداستىرىپ جاتۋى ءبىزدىڭ ەلدىگىمىزدىڭ تاعى ءبىر نىشانى عوي دەپ ويلايمىن. ۇيتكەنى تاريحتان تامىر تارتقان، باۋىرى ءبۇتىن ەل بولعاننان كەيىن، كەشەگى بابالارىمىزدان قالعان ايشىقتى داستۇرلەرىمىز بار. سولاردىڭ قاتارىندا حالقىمىز جەتى قازىنانىڭ ءبىرى دەپ قاستەرلەيتىن ءيتتىڭ الاتىن ورنى ەرەكشە. قازاقتىڭ توبەتى توبەدە جاتقان، تازىسى توسەكتە جاتقان. قازاقتىڭ باتىرى جاۋدىڭ وتىندە ءجۇرىپ، قاسىقتاپ قان توگىپ ەلىن قورعاسا، قازاقتىڭ توبەتتەرى مالىن قورعاعان. سوندىقتان، حايۋان بولسا دا ءبىزدىڭ قازاق يتكە قۇرمەتپەن قاراعان. بۇل يتتەردىڭ باسقا تۇقىمداستارىنا ۇقسامايتىن ارتىقشىلىقتارى كوپ. قازاقى ومىردە تازىلارىمىز ساياتشىلىقتىڭ، سال سەرىلىكتىڭ سيمۆولى بولعان. بۇگىنگى كۇنى ءبىز ءبىر كەزدەرى جوعالعان، السىرەگەن ۇلتتىق قۇندىلىقتارىمىزدى قايتادان قالىپتاستىرىپ، دامىتۋعا كۇش سالىپ جاتىرمىز. مىنە، سونىڭ ءبىر ايعاعى بۇگىنگى وتكەن ءىس- شارا دەپ ايتۋىمىزعا بولادى. بۇل جولدا ءالى دە كوپ تالپىنىس كەرەك»، - دەيدى اقىن نەسىپبەك ايت ۇلى.
باقىتجول كاكەش
