دەپاردە بەلورۋسسيادا «شارۋالار» اراسىندا ءومىر سۇرۋگە نيەت تانىتتى

استانا. قازاقپارات - فرانسۋز اكتەرى جەرار دەپاردە الەكساندر لۋكاشەنكونى قۇرمەتتەگەندىكتەن بەلورۋسسيادا تۇرۋدى قالايتىنىن ءمالىم ەتتى.

«قازىر يتاليادا تۇرامىن. جاقىن ارادا بەلورۋسسياعا كوشەمىن، شارۋالار اراسىندا تىرشىلىك كەشەمىن. ويتكەنى ونداعى تابيعات كوركەم جانە پرەزيدەنتى جاقسى ادام»، - دەدى دەپاردە Le Figaro فرانسۋز گازەتىنە بەرگەن سۇحباتىندا.

 اكتەر ەۋروپانىڭ دامۋ جولى، قازىرگى ەۋروپالىق ليدەرلەر مەن ە و- نىڭ ميگرانتتار مەن فەرمەرلەرگە دەگەن قاتىناسى ۇنامايتىنىن ايتتى.

 دەپاردە بەلورۋسسيادا شىلدە ايىندا بولعان. ول پرەزيدەنت لۋكاشەنكومەن كەزدەستى. مەملەكەت باسشىسى وعان اۋىل شارۋاشىلىعىنداعى جۇمىستى كورسەتىپ، ءشوپ شابۋدى ۇيرەتتى.

2013 - جىلدىڭ قاڭتارىندا رەسەيلىك ازاماتتىقتى العان دەپاردە رەسەي پرەزيدەنتى ۆلاديمير پۋتيندى قۇرمەتتەيتىنىن دە ايتقان.