كاسىپكەر بيزنەسى مەن بالا- شاعاسىنا الاڭداۋلى

استانا. قازاقپارات - شىرقى بۇزىلعان دەمالىسقا قاتىستى ءماجىلىس دەپۋتاتى مەن تۋريستىك فيرما ديرەكتورى اراسىنداعى داۋ جاڭا قارقىن الاتىن سىڭايلى دەپ حابارلادى ك ت ك ارناسى.

كاسىپكەر كەلىنشەك جازعى دەمالىستان شىققان دەپۋتاتتان قاتتى قورقىپ وتىر.

سۆەتلانا رومانوۆسكايانىڭ قاھارىنا ىلىنگەن ول كەڭسەسىنەن دە ەرتەرەك كەتۋگە تىرىسادى.

دەپۋتاتپەن اراداعى تەكەتىرەستى تەلەفونعا جازىپ، كۇللى ەلگە جاريالاپ جىبەرگەن اسەل نۇركەبايەۆا ەندى ول ءىسى ءۇشىن وكىنىپ وتىر ەكەن. ال رومانوۆسكايا وزىنە شاڭ جۋىتقان جوق. ءتىپتى بالاعات سوزدەر جازىلعان تاسپاعا دا كۇمان كەلتىردى.

اسەل دەپۋتاتتىڭ كەسىرى تيە مە دەپ سارى ۋايىمعا سالىنعان. جاتسا دا، تۇرسا دا ويلايتىنى - وسى. ءبىر جولداما ءۇشىن جانجالداسىپ، كۇتپەگەن جەردەن جاۋ تاۋىپ العان كەلىنشەك كەشقۇرىم ۇيىنەن دە شىقپايدى.

«بيزنەسىم ءۇشىن دە، بالام ءۇشىن دە الاڭداپ وتىرمىن. كەڭسەمە كۇدىكتى ءبىر زات قالدىرىپ كەتۋى دە مۇمكىن عوي. سەبەبى، ول قاراپايىم ادام ەمەس. قولىندا بيلىگى بار. «كوزىڭدى قۇرتام، جويام» دەدى»، - دەيدى تۋريستىك كومپانيا باسشىسى اسەل نۇركەبايەۆا.

دەپۋتاتتىڭ دورەكى سوزدەرىن ەستىپ، توبە شاشى تىك تۇرعان اسەلدىڭ اناسى دا قازىر ءتۇن ۇيقىسىنان ايىرىلعان.

كاسىپكەر ەندى تۋريستىك فيرماسىن تەكسەرۋشىلەر كوبەيىپ كەتە مە دەگەن قورقىنىشىن دا جاسىرمادى. ەستەرىڭىزگە سالساق، داۋ شىلدە ايىندا باستالعان.

تۇركياعا جوسپارلانعان دەمالىسىنىڭ شىرقى بۇزىلعاندا ءماجىلىس دەپۋتاتى سۆەتالانا رومانوۆسكايا اشۋعا ءمىنىپتى. تابان استىنان وزگەرگەن اۋە بيلەتتەرى ءۇشىن ابدەن ىزالانعان دەپۋتات شەتەلدەن باقىرىپ قوڭىراۋ شالعان.

ءبىراق دەپۋتاتتىڭ ءوزى مۇنى جوققا شىعاردى. داۋىس مەنىكى ەمەس دەپ ازار دا بەزەر. ەندى ول تاسپانىڭ ءتۇپنۇسقالىعىن تەكسەرتكىزىپ، ءارى دەمالىسىن داۋعا اينالدىرعان تۋرفيرما باسشىسىن سوتقا سۇيرەمەك.

«سوتقا ارىزىمدى دايىنداپ جاتىرمىن. دەپۋتاتتىق جۇمىسىم قاۋىرت بوپ تۇرعاندىقتان، بۇل ىسپەن قازىر زاڭگەرلەرىم اينالىسۋدا. تۋروپەراتورلاردى تارتىپكە كەلتىرۋ كەرەك. سوندىقتان بۇل ىسكە ءبارىبىر دە ءوزىم كىرىسىپ، سوڭىنا دەيىن جەتكىزەم»، - دەيدى ءماجىلىس دەپۋتاتى سۆەتلانا رومانوۆسكايا.

دەپۋتات دەمالىپ كەلگەن جەر - تۇركياداعى ەڭ قىمبات 5 جۇلدىزدى وتەل. وعان رومانوۆسكايا 6800 دوللار جۇمساپتى. ءبىراق حالىق قالاۋلىسىنىڭ كوڭىل- كۇيىن بۇزعان مەيمانحانا ەمەس.

جانجال اۋە بيلەتتەرىنەن شىققان. ەكونوم- كلاسسپەن ۇشۋدان ءۇزىلدى- كەسىلدى باس تارتقان دەپۋتات، اقىرى تۋرفيرماعا «بيزنەس- كلاسسقا» بيلەتتەر الدىرتقان ەكەن.

ەندى تاراپتار ماسەلەنى سوتتا شەشۋى ءتيىس. تەك اسەل نۇركەبايەۆا «قول سۇعىلماۋشىلىق قۇقى» بار دەپۋتات-كليەنتى دەس بەرمەي كەتە مە دەپ الاڭداۋلى.