بۇل جولى تەك ن. نازاربايەۆ قانا قىتايعا مەملەكەتتىك ساپار جاسادى - ق ر ەلشىسى ش. نۇرىشيەۆ

 بەيجىڭ. قازاقپارات - قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆتىڭ قىتاي حالىق رەسپۋبليكاسىنا جاساعان مەملەكەتتىك ساپارى وتە جوعارى دەڭگەيدە ءوتتى جانە وتە ناتيجەلى بولدى.

بۇل تۋرالى قازاقستان جۋرناليستەرىنە ارنالعان باسپا ءسوز ءماسليحاتى بارىسىندا قازاقستان رەسپۋبليكاسىنىڭ قىتاي حالىق رەسپۋبليكاسىنداعى توتەنشە جانە وكىلەتتى ەلشىسى شاحرات نۇرىشيەۆ ءمالىم ەتتى.

«ەڭ الدىمەن، ق ر پرەزيدەنتى نۇرسۇلتان نازاربايەۆتىڭ قىتاي حالىق رەسپۋبليكاسىنا مەملەكەتتىك ساپارى وتە جوعارى دەڭگەيدە وتكەنىن جانە وتە ناتيجەلى بولعانىن اتاپ وتكىم كەلەدى. وزدەرىڭىز دە بايقاعان بولارسىزدار، جاپون باسقىنشىلارىنا قارسى كۇرەستەگى قىتاي حالقىنىڭ جەڭىسى مەن ەكىنشى دۇنيەجۇزىلىك سوعىستىڭ اياقتالۋىنا ورايلاستىرىلعان پارادقا قاتىسۋ ءۇشىن كەلگەن 30 شەت ەلدىڭ مەملەكەت باسشىلارى، ۇكىمەتتىك جانە پارلامەنتتىك دەلەگاتسيا باسشىلارىنىڭ اراسىندا تەك قانا ءبىزدىڭ ەلباسىمىز قىتايعا مەملەكەتتىك ساپار جاسادى. ديپلوماتيا تىلىمەن ايتساق، بۇل - ەڭ جوعارى دەڭگەيدە شەتەلدىك مارتەبەلى مەيماندى قارسى الۋ»، - دەدى ول.

ەلشى سونداي-اق، قىتاي حالىق رەسپۋبليكاسىنىڭ ءتوراعاسى شي جينپيڭنىڭ ن. نازاربايەۆتى قالاي قارسى العانىنا توقتالدى.

«ءتورت كۇن بويى ق ر پرەزيدەنتى وتە كوپ جۇمىس ىستەدى، قانشاما كەزدەسۋ وتكىزدى. ونىڭ ىشىندە باسا ايتار بولساق، ق ح ر ءتوراعاسى شي جينپيڭمەن وتكەن كەلىسسوزدەر بارىسىندا ساياسي، ەكونوميكالىق، ينۆەستيتسيالىق جانە مادەني- گۋمانيتارلىق مازمۇنداعى ماسەلەلەر تالقىلاندى»، - دەپ اتاپ ءوتتى ش. نۇرىشيەۆ.

ونىڭ ايتۋىنشا، ساياسي سيپاتتاعى نەگىزگى جەتىستىك - «نۇرلى جول» جاڭا ەكونوميكالىق ساياساتى مەن ق ح ر ءتوراعاسىنىڭ «جىبەك جولىنىڭ ەكونوميكالىق بەلدەۋى» اتتى باستامانى ءتۇيىستىرۋ تۋرالى ۋاعدالاستىق بولدى.

اۆتور: كەنجەكەي توقتامۇرات قىزى