پارا رەتىندە قوي ەتىن العان پوليتسەي ءۇش جىلعا سوتتالدى

كوكشەتاۋ. قازاقپارات - اقمولا وبلىسىنىڭ اقكول اۋداندىق سوتى قازاقستان رەسپۋبليكاسى قىلمىستىق كودەكسىنىڭ 190-بابى 3-بولىگىنىڭ 2-تارماعى بويىنشا اقكول اۋدانىنىڭ ءى ءى ب- نىڭ اكىمشىلىك پوليتسيا ينسپەكتورىنا قاتىستى ۇكىم شىعاردى، دەپ حابارلادى وبلىستىق سوتتىڭ باسپا ءسوز قىزمەتىنەن.

سوتقا بەلگىلى بولعانداي اتالعان ينسپەكتور ءوزىنىڭ قىزمەت بابىن پايدالانا وتىرىپ، ازامات ۋ- عا قاتىستى اكىمشىلىك ءىس قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنىڭ 608-بابىنىڭ 1-بولىگىنە سايكەس كەلەتىنىن ءبىلىپ، ياعني جازا رەتىندە 6 جىلعا كولىك باسقارۋ قۇقىعىنان ايىرۋ جازاسى تاعايىندالادى دەپ جاڭىلىستىرىپ الداعان جانە ازامات ۋ- دان زاڭسىز تۇردە قوي ەتىن العان.

سوت ينسپەكتوردى كىنالى دەپ تانىپ، وعان جازا رەتىندە وزىنە تيەسىلى جەكە مۇلكىن تاركىلەدى، سونداي-اق، پوليتسيا كاپيتانى شەنىنەن جانە مەملەكەتتىك قىزمەتكە ورنالاسۋ قۇقىعىنان ءومىر بويىنا ايىردى جانە جالپى رەجيمدەگى تۇزەتۋ كولونياسىندا 3 (ءۇش) جىل باس بوستاندىعىنان ايىرۋ جازاسىن تاعايىندادى.

سوت ۇكىمى زاڭدى كۇشىنە ەنگەن جوق.

اۆتور: اسلان وسپانوۆ