تارازدا اقىن كۇلاش احمەتوۆانىڭ ليريكالىق جيناعىنىڭ تۇساۋكەسەرى ءوتتى
جامبىل وبلىسى اكىمدىگىنىڭ ىشكى ساياسات باسقارماسىنىڭ حابارلاۋىنشا، كەزدەسۋگە ارداگەرلەر، جاستار، قالانىڭ شىعارماشىلىق ينتەلليگەنسياسى مەن جۇرتشىلىعىنىڭ وكىلدەرى كەلدى.
جامبىل وبلىسىنىڭ تالاس اۋدانىندا قاراپايىم جۇمىسشى مەن ءۇي شارۋاسىنداعى ايەلدىڭ وتباسىندا دۇنيەگە كەلگەن اقىن تەك قازاقستاندا ەمەس، ودان تىس جەرلەرگە دە تانىمال. كۇلاش احمەتوۆانىڭ تۋىندىلارى كوپتەگەن تىلدەرگە اۋدارىلدى. نازىك ليريزم مەن جارقىن مەتافوراعا تولى ونىڭ پوەزياسىندا قازاق دالاسىنداعى ءسوز بەن ولەڭنىڭ ۇلى ءرولى تۋرالى ويلارى قازاقتىڭ ەرتەگى- اڭىزدارىمەن ۇشتاسىپ وتىرادى.
ءوزىنىڭ جاڭا ليريكالىق جيناعىندا وتان تابيعاتىنا ۇلكەن تاڭدانىسىن بىلدىرگەن اۆتور قازاقستاننىڭ «جاسىل كيىمىن» ساقتاپ، ۇلعايتۋعا شاقىرادى.
«كۇلاش احمەتوۆانىڭ ەسىمى تانىمال قازاقستاندىق جانە شەتەلدىك اقىنداردىڭ ەسىمدەرىمەن ءبىر قاتاردا تۇر، ال ونىڭ شىعارماشىلىعى پوەزيانى سۇيۋشىلەردىڭ ماحابباتىنا بولەنگەن»، - دەدى اقىندى جاڭا جيناعىن شىعارۋىمەن قۇتتىقتاعان جامبىل وبلىسى اكىمىنىڭ ءبىرىنشى ورىنباسارى بەكبولات ورىنبەكوۆ.
كەزدەسۋ بارىسىندا جامبىلدىق جاس اقىنداردىڭ ورىنداۋىندا ونىڭ شىعارمالارى وقىلدى.
***
ماحاببات پوەزياسى
«ءسىز وسى شىنىمەنەن بىلمەيسىز بە،
كەزىگىپ قالا بەرەم بىردەي سىزگە؟
ءسىز جۇرەتىن جەرلەردە، الدە مەنى،
اداسىپ، نە ەرىگىپ ءجۇر دەيسىز بە؟
قاعىلۋى ماحاببات قاناتىنىڭ،
جانىڭىزعا جابىرقاپ باراتىنىم.
بايقالماي ما سىزگە وسى،
قىپ- قىزىل بوپ، قيپاقتاپ قالاتىنىم.
ءسىزدى ويلاماي كوزىمدى ءالى ءىلدىرىپ
كورگەنىم جوق، كەرەك پە جالىندىرۋ؟
ورتەنەمىن جانىما جالىن كىرىپ،
ادەيى ءۇنسىز ءجۇرسىز بە، ءبارىن ءبىلىپ؟ ..
قارا كوزدەن قاشساڭىز، نەسىنە ەرسىز،
ءبىر ادەمى باقىتقا كەشىگەرسىز.
قاراپ قالسام، وتەسىز كورمەگەنسىپ،
نە دەگەن وڭباعانسىز، كەشىرەرسىز...»
اۆتورى: كۇلاش احمەتوۆا
