08:58, 04 - قىركۇيەك 2015 | GMT +5
مىسىر ميللياردەرى بوسقىندار ءۇشىن گرەكيادان نەمەسە يتاليادان ارال ساتىپ الماق
استانا. قازاقپارات - مىسىرلىق ميللياردەر ناگيب ساۆيريس ەۋرو وداق ەلدەرىنە بوسىپ كەلىپ جاتقان ميگرانتتارعا جاعداي تۋعىزۋ ءۇشىن گرەكيادان نەمەسە يتاليادان ارال ساتىپ الماققا نيەتتەنىپ وتىرعانىن ءمالىم ەتتى.
بۇل تۋرالى بەيسەندى كۇنى بيزنەسمەن تۆيتتەرگە جازعان.
«مەيلى گرەكيا نەمەسە يتاليا، ماعان ارالدارىن ساتاتىن بولسا، بوسقىنداردى قابىلداپ ، ولارعا جۇمىس تاۋىپ بەرىپ، جاڭا مەملەكەت قۇرۋلارىنا جاعداي تۋعىزامىن»، - دەپ اتاپ وتكەن ول.
باتىس ب ا ق- تارىنىڭ حابارلاۋىنشا، ساۆيريسكە ارال ساتىپ الۋ وعان كەمىندە 10 ميلليون، ءتىپتى 100 ميليونعا ءتۇسۋى ىقتيمال. ونىڭ ءوزى دە ارالدا كوپتەگەن ادامنىڭ ءومىر ءسۇرۋى ءۇشىن قاجەتتى جاعداي تۋعىزۋ ۇلكەن جۇك ەكەندىگىن مويىنداپ وتىر.
ە و- نىڭ شەكارالىق اگەنتتىگى سوڭعى 7 ايدىڭ ىشىندە ەۋرو وداققا اعىلىپ كەلىپ جاتقان ميگرانتتاردىڭ سانى 340 مىڭعا جەتكەندىگىن ءمالىم ەتتى، دەپ حابارلايدى interfax.ru.
