تانىمال كاسىپكەر مارعۇلان سەيسەمبايەۆ وتاندىق ونىمدەردى قولداۋ ءۇشىن «مەن جاۋاپ بەرەمىن» اتتى باعدارلاما شىعاردى
ول باعدارلاما تۋرالى Facebook پاراقشاسىندا ايتتى، سونىمەن قاتار مۇنى قازاقستاننىڭ د س ۇ- عا كىرۋىمەن بايلانىستىردى.
سەيسەمبايەۆتىڭ ايتۋىنشا، تۇتىنۋشىلار وندىرۋشىلەرگە قاتىستى رەيتينگتەر مەن سىيلىقتارعا سەنبەيدى. سوندىقتان دا ول الەۋمەتتىك جەلى قولدانۋشىلارىنان كەلەسى تالاپتارعا ساي ونىمدەردى ۇسىنۋدى سۇرادى - تاۋاردىڭ ساپاسى، تاۋار ساپاسىنىڭ بۇزىلمايتىنى، ءونىمدى ءوندىرۋ ءۇشىن قولدانىلاتىن ينگرەديەنتتەردىڭ ساپاسى، ءونىمدى ءوندىرۋ پروتسەسىنىڭ دۇرىس جولعا قويىلعانى.
سەيسەمبايەۆ قولدانۋشىلار ۇسىنعان وتاندىق ونىمدەردى ءوزى تەكسەرەتىنىن ايتتى. «ءونىم جوعارىدا ايتىلعان تالاپتارعا ساي بولسا، وعان «ءوزىم جاۋاپ بەرەمىن» دەپ اتالاتىن بەلگى قويىلادى. مۇنداي ءونىمدى جۇرگەن جەرىمدە ايتىپ جۇرەمىن. تەك تۇتىنۋشىلارعا ەمەس، بانكتەرگە، مەملەكەتتىك ورگاندارعا دا. مۇنداي كومپانيانى ءاردايىم قولداپ جۇرەمىن. بۇل ءۇشىن ءوزىمنىڭ بارلىق مۇمكىندىگىمدى پايدالانامىن»، - دەدى كاسىپكەر.
سونىمەن قاتار، باعدارلاما اۆتورى قارجىلىق جاعدايعا قاتىستى مالىمەتتەردى جاريالامايتىنىن، تاراتپايتىنىن ايتتى. «نارىقتا ۇساق ءوندىرىس ورىندارى كوپ. بۇلاردىڭ ونىمدەرىنىڭ ساپاسى تەحنولوگيالىق پروتسەستىڭ دۇرىستىعىنا ەمەس، شەبەردىڭ جۇمىسىنا تىكەلەي بايلانىستى. سوندىقتان، ساۋدا اينالىمى 1 ميلليون دوللاردان كەم كومپانيالاردى قاراستىرمايمىن»، - دەدى سەيسەمبايەۆ.
Tengrinews.kz 
