18:54, 03 - قىركۇيەك 2015 | GMT +5
ۋكراينا رەسەيدى اسكەري قارسىلاس دەپ جاريالادى
استانا. قازاقپارات - ۋكراينا ۇلتتىق قاۋىپسىزدىك جانە قورعانىس كەڭەسى سارسەنبى كۇنى قابىلداعان جاڭا اسكەري دوكترينادا رەسەي «اسكەري قارسىلاس» دەپ جاريالانىپ، ەلدىڭ باسىم باعىتتارىنىڭ ءبىرى رەتىندە ناتو ۇيىمىنا مۇشە بولۋ ماقساتى بەلگىلەنگەن.
بۇل دوكتريناعا قاتىستى ازىرشە ماسكەۋ تاراپىنان رەسمي مالىمدەمەلەر ايتىلعان جوق.
ۋكراينا ۇلتتىق قاۋىپسىزدىك جانە قورعانىس كەڭەسى ۇسىنعان جاڭا اسكەري دوكترينا ەل پرەزيدەنتى پەتر پوروشەنكوعا قول قويۋعا بەرىلگەن.
قاۋىپسىزدىك كەڭەسىندەگى كەزدەسۋدە پرەزيدەنت پوروشەنكو جاڭا قۇجات «رەسەيدى ۋكراينانىڭ اسكەري قارسىلاسى دەپ رەسمي تۇردە جاريالاپ قانا قويماي، سونىمەن بىرگە كيەۆتىڭ الدىنا ەلدىڭ شىعىسى مەن وڭتۇستىگىندە قاجەتتى اسكەري ينفراقۇرىلىمدار قۇرىپ، اسكەر قاناتىن جايۋ مىندەتىن قوياتىنىن» مالىمدەگەن. پوروشەنكونىڭ سوزىنشە، 2020 - جىلعا قاراي ناتو مۇشەلىگىنە قول جەتكىزۋ ءۇشىن ۋكراينا ارمياسى اليانس ستاندارتىنا ساي بولۋعا ۇمتىلۋى ءتيىس.
«ازاتتىق» سايتى
