ءبىر ايدان ارتىق ۋاقىت جۇمىسقا سەبەپسىز كەلمەگەن ازاماتتى زاڭ بويىنشا جۇمىستان شىعارادى - ب. نۇرىمبەتوۆ

استانا. قازاقپارات - بۇگىن ماجىلىستە جاڭا رەداكسياداعى ەڭبەك كودەكسىن تانىستىرا وتىرىپ، دەنساۋلىق ساقتاۋ جانە الەۋمەتتىك دامۋ ۆيتسە- ءمينيسترى ءبىرجان نۇرىمبەتوۆ جۇمىسىنا سالعىرت قارايتىن ازاماتتارعا قاتىستى زاڭ نورماسىن ءتۇسىندىردى.

«ەلىمىزدە راسىمەن قىزمەتكەر جۇمىسىنا ايلاپ كەلمەي قوياتىن جايتتار كەزدەسكەن. ول ادام اۋىرماي- سىرقاماي ۇيىندە جاتا بەرەدى، تەك جۇمىسىنا بارمايدى. بۇرىنعى كودەكس بويىنشا جۇمىس بەرۋشى ونى جۇمىستان شىعارا المايتىن، سەبەبى ول ادامنان تۇسىنىكتەمە الۋى كەرەك. قىزمەتكەر تۇسىنىكتەمە جازۋدان باس تارتسا، ونى باس تارتۋ اكتىسى رەتىندە تىركەۋ كەرەك. سوندىقتان، ءبىز جاڭا قۇجاتتا ول نورمانى الىپ تاستادىق»، - دەپ ءتۇسىنۋدىردى ۆيتسە- مينيستر.

ب. نۇرىمبەتوۆ ءتۇسىندىرىپ وتكەندەي، جاڭا كودەكستىڭ نورمالارىنا ساي، ەگەر ءوندىرىس كولەمى ازايىپ، ەكونوميكالىق شىعىن تۋىنداسا جۇمىس بەرۋشى جۇمىسشىلاردى قىسقارتا الادى.

«جاڭا كودەكس بويىنشا زەينەت جاسى تولعان ازاماتتاردى جۇمىستان شىعارىپ، قىسقارتۋعا بولادى»، - دەپ اتاپ ءوتتى ب. نۇرىمبەتوۆ.

ۆيسە- مينيستر اتاپ وتكەندەي، زەينەتكەر زەينەتكە شىققاننان كەيىن دە جۇمىس ىستەيتىن بولسا، ول جىلىنا ءبىر رەت جۇمىس بەرۋشىمەن ەڭبەك كەلىسىمشارتىن جاڭارتىپ وتىرۋى كەرەك.

اۆتور: كەنجەكەي توقتامۇرات قىزى