الماتىدا ۇرى ءوزىن كۇشپەن توقتاتپاق بولعان پوليتسەيگە پىشاق جۇمسادى

بۇل تۋرالى قالالىق ءى ءى د باسپا ءسوز حاتشىسى سالتانات ازىربەك ايتتى.
وقيعا تۇنگى 2 دە بولعان. بورودين كوشەسىنىڭ بويىنان «بۋران-002» ەكيپاجى موپەدتى سۇيرەپ بارا جاتقان كۇدىكتىنى بايقاعان.
پوليتسەيلەردىڭ توقتا دەگەن بۇيرىعىنا ەر ادام قارسىلىق كورسەتە باستاعان. كۇشپەن توقتاتۋعا بەكىنگەن پوليتسەيدىڭ قولىنا ول پىشاق سۇعىپ العان.
«جاراقات العان پوليتسەيگە جەدەل جاردەم كومەك كورسەتتى. قازىر ونىڭ دەنساۋلىعىنا ەش قاۋىپ ءتونىپ تۇرعان جوق. پوليتسەي اۋرۋحاناعا جاتۋدان باس تارتتى. ۇستالعان ادام جامبىل وبلىسىنىڭ تۋماسى بولىپ شىقتى. ەش جەردە جۇمىس ىستەمەيدى ەكەن. موپەدتى 10 مىڭ تەڭگەگە ساتىپ الدىم دەپ اقتالعان»، - دەدى س. ازىربەك.
كەيىن بەلگىلى بولعانداي، موپەد گرانوۆسكايا كوشەسىندەگى جەكە ءۇيدىڭ اۋلاسىنان ۇرلانعان بولىپ شىقتى. قوجايىندارى جىلجىمالى داربازانى جابۋدى ۇمىت قالدىرعان.
ونىڭ ايتۋىنشا، قازىر كۇدىكتىگە قاتىستى ق ر ق ك ەكى بابى بويىنشا قىلمىستىق ءىس قوزعالدى. ەندى ول بوگدەنىڭ مۇلكىن ۇرلاعانى ءۇشىن ءارى بيلىك وكىلىنە قارۋ سىلتەگەنى ءۇشىن زاڭ الدىندا جاۋاپ بەرمەك.
اۆتور: گۇلميرا عوسمانالي