وقۋ بىتىرگەن تۇلەكتەردى سىناقسىز جۇمىسقا قابىلداۋ نورماسى جويىلادى

استانا. قازاقپارات - قولدانىستاعى ەڭبەك كودەكسىندە جۇمىس بەرۋشى ج و و جانە كوللەدج تۇلەكتەرىن جۇمىسقا سىناقسىز قابىلداۋعا مىندەتتى دەگەن نورما جاڭا كودەكستەن الىنىپ تاستالدى.

بۇل تۋرالى بۇگىن استاناداعى باسپا ءسوز ءماسليحاتىندا ق ر دەنساۋلىق ساقتاۋ جانە الەۋمەتتىك دامۋ ۆيتسە-ءمينيسترى ءبىرجان نۇرىمبەتوۆ ءمالىم ەتتى.

اتاپ ايتقاندا، بۇگىندە جۇمىس بەرۋشى ج و و جانە كوللەدج ستۋدەنتتەرىن جۇمىسقا الۋعا ايتارلىقتاي نيەت بىلدىرمەۋدە، سەبەبى قىزمەتكە العان جاعدايدا ولار سىناق مەرزىمىنسىز بىردەن ەكى جىلعا قابىلدانادى.

كەزىندە بۇل نورما جاستاردى ەڭبەكپەن قامتۋعا قولداۋ جاساۋ تۇرعىسىنان قابىلدانعان ەدى.

«وسى جاعدايدا بۇل نورما تۇلەكتەردى جۇمىسقا الۋدى مىندەتتەمەيدى. ياعني، بۇل نورما جاستاردى قىزمەتكە العاننان كەيىن سىناق مەرزىمىن بەكىتپەي، بىردەن ەكى جىلعا قابىلداۋدى كوزدەيدى. ارينە، جۇمىس بەرۋشى تۇلەكتىڭ بىلىكتىلىگىنە كوز جەتكىزبەگەندىكتەن، ونى جۇمىسقا الۋعا ايتارلىقتاي نيەت بىلدەرمەيدى. بۇل تۇرعىدا ءبىز تەرىس ناتيجەنى كورىپ وتىرمىز، جۇمىس بەرۋشى جاستاردى قىزمەتكە الماۋدى ءجون كورەتىنى ايقىندالدى»، - دەدى ءمينيستردىڭ ورىنباسارى.

ونىڭ سوزىنە قاراعاندا، ەندى جاڭا كودەكستە جۇمىس بەرۋشىگە بولەك ازاماتتارعا سىناق مەرزىمىن ورناتۋعا تىيىم سالاتىن نورما جويىلعان كورىنەدى.

جۇمىس بەرۋشىگە سىناقتان ءوتۋ مەرزىمىن كەز كەلگەن قىزمەتكەر ساناتىنا قويۋ قۇقىعى بەرىلىپ وتىر.

اۆتور: رۋسلان عابباسوۆ