باس پروكۋراتۋرا پارا الىپ سوتتالعان م. وسپانوۆتىڭ بولاشاقتا مەملەكەتتىك قىزمەتكە ورالۋىنا قاتىستى داۋعا نۇكتە قويدى

بۇل وقىرمانداردىڭ اراسىندا داۋلى سۇراقتىڭ ورىستەۋىنە سەبەپ بولعان. سوندىقتان، ەلىمىزدىڭ باس پروكۋراتۋراسى رەسمي سايتىندا بۇل قاڭقۋ اڭگىمەلەرگە قاتىستى تۇسىنىكتەمە بەرىپ وتىر.
«باس پروكۋراتۋرا وسى جاعدايدى ءتۇسىندىرىپ ءوتۋدى ءجون كوردى. 2015 -جىلدىڭ 23 -شىلدەسىندە استانا قالالىق سوتىنىڭ كاسساتسيالىق ساتىسى م. وسپانوۆ ادۆوكاتىنىڭ سوت شەشىمىمەن كەلىسپەيتىنى تۋرالى ءوتىنىشىن قارادى. بۇل رەتتە، نەگىزگى جازا رەتىندە بەرىلگەن ۇكىم، ياعني ايىپپۇل سالۋ ۇكىمى وزگەرىسسىز قالدى دا، قوسىمشا جازا - ءومىر بويى مەملەكەتتىك قىزمەتتە جۇمىس ىستەي المايتىن جازا وزگەردى. بۇل مەرزىم جەتى جىلعا دەيىن قىسقارتىلدى»، - دەلىنگەن باس پروكۋراتۋرانىڭ اقپاراتىندا.
«نەگە مۇنداي شەشىم قابىلداندى؟ بۇل سىبايلاس جەمقورلار ءۇشىن مەملەكەتتىك قىزمەتتەگى لاۋازىمدى اتقارۋ قۇقىعىنان ءومىر بويىنا ايىرۋدى ەنگىزگەن، بيىل قابىلدانعان جاڭا قىلمىستىق كودەكسكە بايلانىستى قىلمىستىق زاڭنىڭ سوتتالعان ادامنىڭ جاعدايىن ناشارلاتۋعا جول بەرمەۋ بولىگىندەگى تالاپتارىنا سايكەس قابىلدانعان شەشىم. وسپانوۆ قىلمىستى بۇرىنعى قىلمىستىق زاڭ ارەكەت ەتكەن كەزەڭدە، ياعني، مەملەكەتتىك قىزمەتتەگى لاۋازىمدى اتقارۋ قۇقىعىنان ماكسيمالدى ايىرۋ جەتى جىلعا دەيىن قاراستىرىلعان كەزدە جاسادى. ءىستى قايتا قاراۋ كەزىندە جوعارىدا ايتىلعان سوت قىلمىستىق قۇقىقتىڭ نەگىزىن قالايتىن - سوتتالعان ادامنىڭ جاعدايىن ناشارلاتۋعا جول بەرمەۋ تۋرالى پرينسيپىن نەگىزگە الدى. سوتتالعان ادامنىڭ جاعدايىن ناشارلاتاتىن زاڭنىڭ كەرى كۇشى جوق ەكەنى بارشاعا ءمالىم. ءسويتىپ، جوعارىدا ايتىلعان سوت شەشىمىمەن جازا زاڭدى تۇردە وسپانوۆ قىلمىس جاساعان مەزەتتە قولدانىستاعى قىلمىستىق كودەكسپەن سايكەس كەلتىرىلدى»، دەپ تۇسىندىرەدى قۇزىرلى ورگان.
«الايدا، بۇل وسى ازامات جەتى جىلدان كەيىن مەملەكەتتىك قىزمەتكە قايتىپ كەلە الادى دەگەندى بىلدىرمەيدى. سەبەبى، «مەملەكەتتىك قىزمەت تۋرالى» زاڭنىڭ 10-بابىنىڭ 4-تارماعى 6-2-تارماقشاسىنا سايكەس سىبايلاس جەمقورلىق قىلمىس جاساعانى جانە سول ءۇشىن سوتتالعان ادامدى مەملەكەتتىك قىزمەتكە ەشقاشان قابىلداۋعا بولمايدى. سوندىقتان، كورسەتىلگەن مەملەكەتتىك قىزمەتتەگى لاۋازىمدى اتقارۋ قۇقىعىن 7 جىلعا شەكتەيتىن سوت شەشىمىنە قاراماستان، وسپانوۆ قولدانىستاعى مەملەكەتتىك قىزمەت تۋرالى زاڭعا سايكەس مەملەكەتتىك ورگاندارداعى قانداي دا ءبىر لاۋازىمدى يەلەنۋگە ءتىپتى، ەشقاشان ۇمىتتەنە دە المايدى»، - دەلىنگەن حابارلامادا.
اۆتور: كەنجەكەي توقتامۇرات قىزى