استانا قالاسىنىڭ ماڭىنداعى قابانباي اۋىلى اۋماعىندا «التىن تۇلپار» الامان بايگەسى وتەدى
دەپ حابارلايدى ۇلتتىق سپورت تۇرلەرى قاۋىمداستىعىنان.
قازىر اتالمىش جارىسقا دايىندىق شارالارى جۇرگىزىلۋدە. ءدۇبىرلى دودانى ۇيىمداستىرۋشىلاردىڭ ءبىرى ق ر ۇلتتىق سپورت تۇرلەرى قاۋىمداستىعىنىڭ ۇيلەستىرۋشىسى البەرت ءمۇرسالىموۆتىڭ ايتۋىنشا، بيىلعى بايگەگە قاتىسۋعا ەلىمىزدىڭ تۇكپىر- تۇكپىرىنەن وتىنىمدەر كەلىپ ءتۇسىپ جاتىر.
«بۇگىنگە دەيىن 68 ۇمىتكەر تىزىمدەلدى. ءبىراق بارلىق قۇجاتتارى تولىق ءوتىنىم - 48. ال قالعان ۇمىتكەرلەر بارلىق قۇجات- قاعازدارىن تولىقتاپ بۇگىن- ەرتەڭ جىبەرەمىز دەپ وتىر. جارىسقا قاتىسۋعا نيەت ەتكەندەر وبلىستىق سپورت باسقارماسىنىڭ ءمورى باسىلعان، جارىسقا قاتىساتىن جۇيرىك مال دارىگەرلىك تەكسەرۋىنەن وتكەن قاعازى جانە بايگەگە شابار شاباندوز بالانىڭ اتا- اناسىنىڭ رۇقساتى بولۋى كەرەك. بۇل قاعازدار ارنايى نوتاريۋس ارقىلى بەكىتىلۋى ءتيىس. وسى قۇجاتتارى تالاپقا ساي بولعان جۇيرىكتەر بايگەگە جىبەرىلەدى»، - دەدى ا. ءمۇرسالىموۆ.
بىلتىر جارىسقا 77 ات تىركەلگەن. وسىلاردان 49 جۇيرىك بايگەگە قوسىلعان. قالعان 25 جىلقىنىڭ جارىسقا قوسىلماي قالعان سەبەبى - قاعاز- قۇجاتتارى دۇرىس بولماعان.
جارىسقا قاتىسۋعا بۇگىنگى تاڭدا پاۆلوداردان - 5، قىزىلوردادان - 5، استانا قالاسىنان - 5، جامبىلدان - 8، ماڭعىستاۋدان - 11، اقتوبەدەن - 1، قوستانايدان - 3، قاراعاندىدان - 6، اتىراۋدان - 2، شىعىس قازاقستاننان - 2 جۇيرىكتەن ءوتىنىم كەلىپ تۇسكەن.
جارىس ءار اينالىمى 12,5 شاقىرىمدى قۇرايتىن 4 اينالىمدى قۇرايدى. 1.5 شاقىرىم سايىن ءبىر- بىردەن 7 باقىلاۋ بەكەتى ورنالاسادى. ول باقىلاۋ بەكەتىندە تورەشى، مال جانە ادام دارىگەرى، ءتارتىپ ساقشىلارى جانە كامەرا تۇرادى. بۇدان باسقا، 2 تىكۇشاق جارىس بارىسىن بيىكتەن بەينەكامەراعا تۇسىرەدى.
ەسكە سالا كەتەيىك، بيىلعى «التىن تۇلپار» الامان بايگەسىنىڭ جۇلدە قورى 23 ميلليون تەڭگەنى قۇراسا، باس جۇلدە 10 ميلليون تەڭگە دەپ جوسپارلانىپ وتىر.
