10:19, 02 - قىركۇيەك 2015 | GMT +5
ب ۇ ۇ: گازا سەكتورى بەس جىلدان كەيىن تۇتاستاي قاڭىراپ قالۋى مۇمكىن
استانا. قازاقپارات - ب ۇ ۇ جاڭا بايانداماسىنا سايكەس، ەگەر قازىرگىدەن جاعداي جاقسارمايتىن بولسا، گازا سەكتورى تاياۋ بەس جىل ىشىندە ەلسىز دالاعا اينالۋى مۇمكىن، دەپ جازادى بي- بي- سي.
گازاعا قارسى ءۇش سوعىس وپەراتسياسى مەن يزرايلدىڭ قورشاپ الۋى سالدارىنان سوڭعى جىلدارى كوپتەگەن الەۋمەتتىك- ەكونوميكالىق كورسەتكىشتەر شامامەن 50 جىل بۇرىن ءيزرايلدىڭ ءوڭىردى باسىپ العانعا دەيىنگى كورسەتكىشتەرىنەن تومەندەپ كەتكەن.
ب ۇ ۇ ساۋدا جانە دامۋ كونفەرەنتسياسىندا جاريالانعان قۇجاتتا گازا سەكتورىنىڭ كوپتەگەن تۇرعىندارى ازىق- تۇلىك، اۋىزسۋ، ەلەكتردىڭ جەتىسپەۋشىلىگىنەن زارداپ شەگىپ وتىرعانى، سونىمەن قاتار ءوندىرىس كولەمى وتە تومەن، ال جۇمىسسىزدىق دەڭگەيى جوعارى ەكەندىگى ايتىلعان.
ب ۇ ۇ وڭىرگە حالىقارالىق كومەك قاجەت، الايدا بۇل شارا قيىندىقتى تەك ۋاقىتشا عانا شەشەدى دەپ سانايدى.
