ن. نازاربايەۆ بەيجىڭگە وسى جولعى ساپارى نەسىمەن تاڭعالدىرعانىن ايتتى
بۇل تۋرالى مەملەكەت باسشىسى «دياويۋيتاي» قىتاي مەملەكەتتىك رەزيدەنسياسىنداعى باسپا ءسوز ءماسليحاتىندا ايتتى.
« بەيجىڭنىڭ تاپ- تازالىعى. مىنا شارانى (قىتاي حالقىنىڭ جاپوندىق باسقىنشىلارعا قارسى كۇرەسى سوعىسىنداعى جەڭىسىنىڭ 70 جىلدىعىنا ارنالعان سالتاناتتى پاراد - رەد. ) وتكىزۋ ءۇشىن وتە كوپ كۇش جۇمساپ، بەيجىڭ توڭىرەگىندەگى زاۋىتتاردى توقتاتىپ، بەيجىڭدىك جۇمىسكەرلەردىڭ بارلىعىنا دەمالىس بەرىپ، وسى كۇندەرى قالانىڭ ىشىندە جەڭىل كولىكتىڭ ءجۇرۋىن شەكتەدى، قالا تازالىعىن قامتاماسىز ەتتى. بۇل تاڭقالارلىق نارسە. ەگەر دە قىتاي مەملەكەتى ءبىر نارسەنى قولىنا السا، ولار ونى تاڭقالارلىق ەتىپ جاسايدى»، - دەدى مەملەكەت باسشىسى قازاقپارات ءتىلشىسىنىڭ ساۋالىنا جاۋاپ بەرۋ كەزىندە.
سونىمەن قاتار ن. نازاربايەۆ ق ح ر ءتوراعاسى شي جينپيڭمەن رەسمي كەزدەسۋ ءراسىمى تۋرالى ايتتى.
«كەزدەسۋدىڭ ءوزى وتە وزگەشە جاعدايدا ءوتتى. ارينە، مەن رەسمي مەملەكەتتىك ساپارمەن كەلدىم. سوندا دا وزدەرىڭىز كوردىڭىزدەر، زەڭبىرەكتەن وق اتىلدى، كىشكەنتاي بالالار جينالدى. مۇنداي ۇلكەن كوڭىل بولگەنى ارينە، ۇلكەن اسەر قالدىرادى»، - دەدى ەلباسى.
دەگەنمەن، ن. نازاربايەۆ ق ح ر تۋرالى ءوزىنىڭ جاقسى بىلەتىنىن، سونداي- اق ەكى ەل باسشىلارىنىڭ جىل سايىن ءوزارا ىسساپارلارمەن بارىپ- كەلىپ تۇراتىنىن ەسكە سالدى.
«ماسەلەلەردى تىعىز ءوزارا بايلانىستا شەشىپ وتىرامىز. بۇل بىزگە وتە قاجەت. قىتاي ءبىزدىڭ ءىرى ساۋدا- ەكونوميكالىق ارىپتەستەرىمىزدىڭ ءارى كورشىلەرىمىزدىڭ ءبىرى. سوندىقتان بۇل ەلمەن جاقىن قارىم- قاتىناس قازاقستان ءۇشىن بارلىق جاعىنان وتە ءتيىمدى»، - دەدى پرەزيدەنت.
باسپاءسوز ءماسليحاتى سوڭىندا: «مۇندا تاعى قانداي وزگەرىستەر بولىپ جاتقانى تۋرالى بىزگە سەن ايتىپ بەر. سەن وسىندا ىستەپ ءجۇرسىڭ، ونى كۇندە كورىپ ءجۇرسىڭ»، - دەپ قالجىڭدادى ەلباسى قازاقپاراتتىڭ بەيجىڭدەگى تىلشىسىنە.
ەسكە سالا كەتەيىك، ن. نازاربايەۆ قىتايعا جاساعان مەملەكەتتىك ساپارى اياسىندا ق ح ر ءتوراعاسى شي جينپيڭمەن جانە مەملەكەتتىك كەڭەسى پرەمەرى لي كىشياڭمەن، سونداي- اق قىتايلىق ىسكەرلىك جانە قارجىلىق توپتار وكىلدەرىمەن كەزدەستى.
