قاسيەتتى قاعبانىڭ سالىنۋى

استانا. قازاقپارات - يبراھيم (ا. س. ) مەن ۇلى يسمايىلدىڭ قازىرگى تاڭداعى قاسيەتتى قاعبانى قايتا تۇرعىزۋلارى بىلاي ەدى.
None
None

يسمايىل (ا. س. ) ءزامزام سۋىنىڭ ماڭايىندا ءوسىپ تۇرعان اعاشتىڭ استىن كولەڭكەلەپ، وق جونىپ وتىرعان- دى. ءبىر مەزەت سونادايدان وزىنە قاراي كەلە جاتقان اكەسى ءيبراھيمدى (ا. س. ) بايقاعان ول دەرەۋ اتىپ تۇرىپ، الدىنان قۋانا جۇگىرىپ شىقتى. كوپتەن كورىسپەي، ساعىنىسقان اكە مەن بالانىڭ قۇشاقتارى ايقاسا كەتتى. بالاسىنىڭ شاشىنان سيپاپ، ماڭدايىنان يىسكەپ، ماۋقىن باسقان اكە مەن اكە مەيىرىمىنە شولدەگەن بالا اراسىندا ارتىنشا تومەندەگىدەي اڭگىمە ءىزىن تاپتى.

- بالام، اللا تاعالا ماعان ۇلكەن مىندەت جۇكتەپ وتىر.

- اكە، ول قانداي مىندەت؟ اللا تاعالا جۇكتەگەن مىندەتتى تەزىرەك اتقارعانىڭىز ءجون بولار.

- ءبىراق، وعان سەنىڭ كومەگىڭ كەرەك، بالام.

- اكە، مەن قاشان دا وزىڭىزگە قولعابىس ەتۋگە ءازىرمىن. ونداي ابىرويلى ىستەن ماعان دا ۇلەس تيگەنى اللانىڭ ماعان وڭ قاراعانى شىعار، - دەدى يسمايىل ىشتەگى قۋانىشىن جاسىرا الماي. اكە دە بالاسىنان وسى جاۋاپتى كۇتكەندەي:

- ەندەشە، ءدال مىنا تۇستان اللانىڭ ءامىرىن ورىنداپ، قۇلشىلىق ورنىن سالايىق، - دەدى قازىرگى تاڭداعى كۇللى الەمدەگى مۇسىلمانداردىڭ عيبادات ورنى سانالاتىن قاسيەتتى قاعبانىڭ ورنىن كورسەتىپ.

وسىلايشا، اللا تاعالانىڭ وزدەرىنە بەلگىلەپ كورسەتكەن جەرىنەن قاعبانىڭ قايتا سالىنۋىن باستاپ تا كەتتى. يسمايىل تاس تاسىپ، اكەسى يبراھيم (ا. س. ) قاسيەتتى ءۇيدىڭ قابىرعاسىن قالاي باستادى. جۇمىس وڭعا باسىپ، قۇرىلىس بيىكتەگەن سايىن يبراھيم (ا. س) ءۇشىن تاس قالاۋ قيىنعا سوقتى. ەكەۋى ءوزارا ويلاسىپ، يسمايىل اكەسىنىڭ اياعىنىڭ استىنا تەكپەشەك، ساتى تارىزدەس ۇزىنشا، بيىك تاس اكەلىپ قويدى.

يبراھيمنىڭ (ا. س. ) اياعىنىڭ ءىزى تۇسكەن بۇل تاس قازىرگى كەزدە «ماقامۋ يبراھيم» دەپ اتالىپ، قاجىلىقتا سول تۇستا ارنايى ناماز وقىلىپ، ەرەكشە زيارات ەتىلۋدە. مۇسىلماندار ءۇشىن جەر بەتىندە قاعبادان دا قاسيەتتى ەكىنشى ءبىر ورىن جوق. ويتكەنى بۇل كيەلى عيبادات ءۇيى ۇلى جاراتۋشىمىزدىڭ ءامىر ەتىپ جەبىرەيىلدىڭ (ا. س. ) جوباسىن كورسەتۋى ارقىلى سالىنعان.

قاعبانىڭ ءتورت قابىرعاسى قالانىپ، كەزەك بۇگىنگى «حاجارۋل- ءاسۋاد» دەپ اتالاتىن قاسيەتتى قارا تاس تۇرعان بۇرىشقا جەتكەندە، يبراھيم (ا. س. ) ۇلى يسمايىلعا تاۋاپتىڭ باستالاتىن ورنىن بىلدىرەتىن بەلگى رەتىندە ءبىر تاس اكەلۋىن تاپسىردى. يسمايىل اكەسىنىڭ تاپسىرماسىن ورىنداۋ ءۇشىن تاس ىزدەپ تاۋعا كەتكەندە، جەبىرەيىل پەرىشتە يبراھيمگە (ا. س. ) جۇماقتان تاس الىپ كەلىپ، قاعبانىڭ بۇرىشىنا سول تاستى قويۋ كەرەكتىگىن جەتكىزەدى.

ريۋاياتتار بويىنشا، بۇل قاسيەتتى تاس اۋەلدە قارداي ءاپپاق كورگەندەردى تاڭ قالدىرار جۇماقتان اكەلىنگەن ەكەن. ءبىراق كەيىننەن ۋاقىت وتە كەلە ادامداردىڭ كۇناھار قولدارى تيە- تيە قارا تاسقا اينالىپتى.

قاسيەتتى قارا تاستى قاعبانىڭ بۇرىشىنا ورنالاستىرۋمەن قاعبانىڭ قۇرىلىسى تولىق اياقتالىپ، يبراھيم (ا. س. ) مەن ۇلى يسمايىل راببىلارىنا قول جايىپ بىلايشا دۇعا جاساپ، تىلەك تىلەدى:

«راببىمىز! بىزدەن (بۇل ىستەگەن ءىسىمىزدى) قابىلال! سەن (تىلەگىمىزدى) ەستۋشى جانە ءبىلۋشىسىڭ. ەي، راببىمىز، ەكەۋمىزدى دە وزىڭە عانا بويۇسىنۋشى قىل، ۇرپاقتارىمىزدان دا وزىڭە عانا بويۇسىنۋشى ۇممەت جاساي گور، ءارى بىزگە قاجىلىق امالدارىمىزدى كورسەتىپ، تاۋبەمىزدى قابىل ال! البەتتە، سەن تاۋبەمىزدى قابىل الۋشى جانە مەيىرىم ەتۋشىسىڭ. ەي، راببىمىز ۇرپاعىمىزدىڭ ىشىنەن ولارعا اياتتارىڭدى وقيتىن، كىتابىڭدى جانە تاعىلىمدا- رىڭدى ۇيرەتەتىن، ولاردى (شىركتەن) تازالايتىن ەلشى جىبەرە گور. كۇمانسىز، سەن شەكسىز قۇدىرەت يەسى ءعازيزسىڭ، ءار ءىستى ورىندى ىستەيتىن، ەشنارسەنى بوسقا ىستەمەيتىن حاكيمسىڭ».

سوڭعى جاڭالىقتار