قازاقستاندى قىتاي الدىندا قارىزعا باتىپ جاتىر دەپ ويلاۋدىڭ قاجەتى جوق - ن. نازاربايەۆ
«بۇكىل دۇنيەجۇزىندە قازىر داعدارىس. دۇنيەجۇزىنىڭ بانكتەرىندە قازىر ءبىز الا الاتىنداي اقشا جوق. سوندىقتان قىتايدان الىپ وتىرمىز، وسى كەزەڭدە ونى پايدالى ءىس دەپ ساناۋ كەرەك. بۇل جەردە قارىزعا باتىپ جاتىرمىز دەپ ويلاۋدىڭ قاجەتى جوق ەكەنىن ايتا كەتكەن ءجون. كەيبىرى (جوبالار - رەد. ) تۇگەل قىتايدىڭ قارجىسىنا سالىناتىن بولادى. كەيبىرى ەكى جاقتان بىرىككەن كومپانيا رەتىندە سالىنباق. كەيبىرىنە تومەن پايىزبەن ۇزاقمەرزىمدى جەڭىلدىكپەن بەرىلەتىن نەسيە الامىز. بارلىق جاعىنان الىپ قاراعاندا، ول بىزگە ءتيىمدى»، - دەدى مەملەكەت باسشىسى جۋرناليستەردىڭ ساۋالىنا جاۋاپ بەرۋ كەزىندە.
ن. نازاربايەۆ ەلدىڭ قارىز بويىنشا مىندەتتەمەلەرىنىڭ باقىلاۋدا ەكەنىن جانە ونىڭ شەكتەن شىعىپ كەتپەۋى قاداعالانىپ وتىرعانىن ايتتى.
«كەيبىر جوبالار كەلىسىم بويىنشا قازاقستان ءۇشىن تەگىن بولادى. مىسالى، الماتىنىڭ توڭىرەگىندە ءۇ ا ا ج (ۇلكەن الماتى اينالما جولى) دەگەن اينالىپ وتەتىن جول بار. ونىڭ ۇزىندىعى 100 شاقىرىمنان ارتىق بولادى. ول تولىعىمەن قىتاي قاراجاتىنا سالىنادى»، - دەدى مەملەكەت باسشىسى.
قىتايدىڭ ينۆەستيتسياسىنا سالىناتىن ينفراقۇرىلىمدىق جوبالار رەتىندە ن. نازاربايەۆ الماتىدان وسكەمەنگە باراتىن جولدى، وسكەمەننەن ءۇ ا ا ج- ىنا، قىتايدىڭ شەكاراسىنا باراتىن جولدى، الاكول مەن الاتاۋ وتكەلىنە دەيىن باراتىن جولدى اتاپ ءوتتى.
«بۇنىڭ بارلىعى ءبىز ءۇشىن اسا ءتيىمدى. ارينە، بۇل ماسەلەگە تۇسىنىستىكپەن قاراۋ كەرەك. ونەركاسىپتىك جوبالاردى جىلدامىراق جۇزەگە اسىرۋ ءۇشىن ءبىز وزىمىزدە جوق قىتايلىق مامانداردى الىپ كەلەتىن بولامىز. مىسالى، ءوندىرىس ءبىر جىل سالىنسا، ءبىر جىلعا 500 قىتاي مامانىن الىپ كەلۋگە رۇقسات بەرەمىز. بۇل ماسەلەنىڭ ءبارىن (ق ح ر- مەن - رەد.) كەلىسىپ جاتىرمىز»، - دەپ ايتتى ەلباسى.
ن. نازاربايەۆتىڭ قىتايعا مەملەكەتتىك ساپارى 3 - قىركۇيەككە دەيىن جالعاسادى. بەيسەنبى كۇنى ق ر پرەزيدەنتى قىتاي حالقىنىڭ جاپوندىق باسقىنشىلارعا قارسى كۇرەسى سوعىسىنداعى جەڭىسىنىڭ 70 جىلدىعىنا ارنالعان سالتاناتتى پارادقا قاتىسادى.
سادىق اكىجانوۆ
