كورەيا پرەزيدەنتى: سەۋل مەن پحەنيان بەيبىتشىلىك پەن بىرىگۋگە قوزعالىستى باستاي الادى

بۇل تۋرالى سەيسەنبى كۇنى وڭتۇستىك كورەيالىق پرەزيدەنت پاك كىن حە مالىمدەدى.
«ەگەر قيىندىقپەن قول جەتكىزىلگەن ۋاعدالاستىقتار ويداعىداي ورىندالسا، كورەيا تۇبەگىندەگى بەيبىتشىلىك پەن بىرىگۋ، ىنتىماقتاستىق جاعىنا قاراي قوزعالىستى باستاۋعا بولادى»، - دەپ اتاپ كورسەتتى ول مينيسترلەر كابينەتىنىڭ وتىرىسىندا.
كورەيا رەسپۋبليكاسىنىڭ كوشباسشىسى ەكى ەل 1950-1953 - جىلدارداعى سوعىس اجىراتقان وتباسىلاردىڭ تۋىستارىمەن كەزدەسۋىن ويداعىداي وتكىزە الاتىنىنا ءۇمىتىن ءبىلدىردى. ونى ۇيىمداستىرۋعا قاتىستى كەلىسسوزدەر 7 - قىركۇيەكتە، ال كەزدەسۋدىڭ ءوزى 27 - قىركۇيەكتە، كورەيادا ەگىن مەرەكەسى جانە چحۋسوك اتا- بابالارىن ەسكە الۋ كۇنىندە بولۋى ءتيىس، دەپ جازادى ت ا س س.
2009 - جىلعى كورەيالىق تاريحي سامميتتەن كەيىن پحەنيان مەن سەۋل جارتى عاسىردان استام ۋاقىت بويى تۋىستارى مەن جاقىندارىن كورمەگەن تۋىسقانداردىڭ كەزدەسۋىن بىرنەشە رەت وتكىزدى. سوڭعىسى - 2014 -جىلدىڭ باسىندا ءوتتى. سولتۇستىك جانە وڭتۇستىك كورەياعا بولىنگەن تۇرعىندار ءبىر- بىرىنە قوناققا بارا المايدى، حات جازىسا المايدى، تەلەفونمەن سويلەسۋگە دە جانە ينتەرنەت ارقىلى بايلانىسۋعا دا مۇمكىندىك جوق.
وتكەن اپتادا وتكەن ك ح د ر مەن كورەيا رەسپۋبليكاسىنىڭ جوعارى مارتەبەلى وكىلدەرىنىڭ كەلىسسوزدەرىندە تاراپتار «قىسقا مەرزىمنىڭ ىشىندە پحەنياندا نەمەسە سەۋلدە كورەيالىق قاتىناستاردى ساۋىقتىرۋ بويىنشا وكىمەتتەر اراسىندا كەلىسسوزدەردى اشۋ جانە بۇدان بىلاي ءبىرقاتار سالالار ماسەلەلەرى بويىنشا ديالوگ پەن كەلىسسوزدەر جۇرگىزۋ، سونداي- اق بولىنگەن وتباسىلار مۇشەلەرىنىڭ، ولاردىڭ تۋىستارىمەن كەزدەسۋىن ۇيىمداستىرۋ جانە ونى بۇدان بىلاي جالعاستىرۋ جونىندە ۋاعدالاستى. سولتۇستىك جانە وڭتۇستىك سونداي- اق ءارتۇرلى سالالارداعى ازاماتتىق ۇيىمدار اراسىندا الماسۋدى جانداندىرۋعا ۋادە بەردى.