ءبىرىنشى سىنىپقا بارىپ، ەلباسى كىتابىن الۋ - ۇلكەن باقىت - ە. نىعمەت، ب ق و - فوتو

بۇل تۋرالى ۇلى ءامىرحان ورال قالاسىنداعى دارىندى بالالارعا ارنالعان مامانداندىرىلعان س. سەيفۋللين اتىنداعى №11 وبلىستىق قازاق مەكتەپ- ينتەرنات كەشەنىنىڭ 1 «ب» سىنىبىنا بارعان ەۆگەنيا نىعمەت ءمالىم ەتتى.
ونىڭ ايتۋىنشا، ادەمى بەزەندىرىلگەن، قازاقستان تۋرالى اتالعان كىتاپ بالدىرعانداردى كىشكەنتاي كەزىنەن كەڭ بايتاق وتانىن ءسۇيىپ وسۋگە تاربيەلەيدى. مۇنداي كىتاپ ارقىلى بالا ءوز ەلىن، ونىڭ تابيعاتى مەن تاريحىن تانىپ- بىلە تۇسەدى. بۇل ولار ءۇشىن ەستەن كەتپەيتىن ەرەكشە سىيلىق بولدى.
ە. نىعمەتتىڭ ءسوزىن راحىمجان كەنەنبايدىڭ اكەسى ەرعالي قاجى كەنەنباي ۇلى، ءمادينا قابيردىڭ اناسى جاننات قايىرجان قىزى، سۇلتان اسىلبەكتىڭ اجەسى، جاڭاقالا اۋدانىنان كەلگەن رايا شالابايەۆا دا قوستادى. «نەمەرەمىزدىڭ ەلباسى سىيلىعىن الىپ، مەكتەپ تابالدىرىعىن اتتاۋى جاقسى ىرىم دەپ بىلەمىن. بولاشاقتا وقۋدا وزات، ەڭبەكتە قاتارىنىڭ الدى بولادى دەپ سەنەمىن»، دەدى ر. شالابايەۆا.
ايتا كەتەيىك، 90 جىلدان استام تاريحى بار، مەملەكەت جانە قوعام قايراتكەرى، اقىن ساكەن سەيفۋللين ىرگەسىن قالاعان اتالمىش مەكتەپتە بيىل ءبىرىنشى ءۇش سىنىپقا 92 ءبۇلدىرشىن باردى. ولارعا مەرۋەرت يشانوۆا، روزا مۇتەنوۆا، ۇلبولسىن قۇرماشيەۆا سىندى تاجىريبەلى ۇستازدار ساباق بەرەدى.