زەينەتاقى جۇيەسى اكەلەتىن وزگەرىستەر

استانا. قازاقپارات - وتكەن جىلى زەينەتاقى جۇيەسىن جاڭعىرتۋدىڭ تۇجىرىمداماسى قابىلدانعانى بەلگىلى.
None
None

مەملەكەت باسشىسىنىڭ تاپسىرماسى بويىنشا ۇكىمەت پەن ۇلتتىق بانك بىرلەسە وتىرىپ، قازاقستاننىڭ زەينەتاقى جۇيەسىن كەزەڭ- كەزەڭمەن جاڭعىرتۋ بويىنشا جۇمىس جۇرگىزۋدە. ونىڭ ءبىرىنشى كەزەڭى بۇگىندە جۇزەگە اسىرىلۋ ۇستىندە. نە تىندىرىلدى؟

اشىق جەكە زەينەتاقى شوتتارىنىڭ سانى - 9,7 ميلليون بىرلىككە جەتىپ، مىندەتتى كاسىپتىك زەينەتاقى جارنالارى ەسەبىنەن زەينەتاقى جارنالارى 26,3 ميلليارد تەڭگەنى قۇرادى. 4,6 مىڭنان استام جۇمىس بەرۋشى مىندەتتى كاسىپتىك زەينەتاقى جارنالارىن اۋداردى.

ال ەندى زەينەتاقى جۇيەسىن جاڭعىرتۋ تۇجىرىمداماسى اياسىندا مىناداي شارۋالار اتقارىلادى دەپ كۇتىلۋدە. 2016 -جىلعى 1 -قاڭتاردان باستاپ الەۋەتتى قۇرىلىمدار قىزمەتكەرلەرىن زەينەتاقىمەن قامتۋ جۇيەسى رەفورمالانادى. 2017 -جىلعى 1 -شىلدەدەن باستاپ بازالىق زەينەتاقى تاعايىنداۋ ءتارتىبى وزگەرەدى. ال، 2018 -جىلعى 1 -قاڭتاردان باستاپ جۇمىس بەرۋشىنىڭ قاراجاتى ەسەبىنەن قوسىمشا %5 دىق زەينەتاقى جارنالارى ەنگىزىلمەك.

2017 -جىلدىڭ شىلدە ايىنان باستاپ زەينەتاقى مولشەرى جيناقتاۋشى جۇيەگە قاتىسۋ وتىلىنە بايلانىستى انىقتالادى. ماسەلەن، جالپى ەڭبەك ءوتىلى 10 جىل جانە ودان كەم بولسا، بازالىق زەينەتاقى مولشەرى كۇنكورىس دەڭگەيى كولەمىنىڭ 50 پايىزىنا تەڭ بولادى. ال ەڭبەك ءوتىلى 10 جىلدان كوپ بولعان جاعدايدا، ءاربىر تولىق جىل ءۇشىن بازالىق زەينەتاقى 2 پايىزعا ءوسىپ وتىرادى. ءسويتىپ، بازالىق زەينەتاقى مولشەرى 20 جىلدا - 70 پايىز، 35 جىلدا - 100 پايىز كۇنكورىس دەڭگەيىنە تەڭەستىرىلەدى.

وسىعان وراي، دەنساۋلىق ساقتاۋ جانە الەۋمەتتىك دامۋ مينيسترلىگى ءبىرقاتار زاڭدارعا وزگەرىستەر مەن تولىقتىرۋلار ەنگىزدى. اتاپ ايتساق، ول - سالىق كودەكسى، «قازاقستان رەسپۋبليكاسىندا زەينەتاقىمەن قامسىزداندىرۋ تۋرالى» جانە «قازاقستان رەسپۋبليكاسىندا مۇگەدەكتىگى بويىنشا، اسىراۋشىسىنان ايرىلۋ جاعدايى بويىنشا جانە جاسىنا بايلانىستى بەرىلەتىن مەملەكەتتىك الەۋمەتتىك جاردەماقىلار تۋرالى» قازاقستان رەسپۋبليكاسىنىڭ زاڭدارى.

سول وزگەرىستەر ناتيجەسىندە ازاماتتاردىڭ زەينەتاقى تولەمدەرى مىناداي بولىكتەردەن تۇراتىن بولادى:

زەينەتاقى جۇيەسىنە قاتىسۋ وتىلىنە بايلانىستى تاعايىندالاتىن بازالىق زەينەتاقى تولەمى؛

1998 -جىلعى 1 -قاڭتارعا كەمىندە التى اي ەڭبەك ءوتىلى بار ادامدارعا ورتالىقتان تولەنەتىن زەينەتاقى تولەمى؛

ب ج ز ق- دان:

- قىزمەتكەردىڭ جەكە %10 زەينەتاقى جارنالارى؛

- جۇمىس بەرۋشىنىڭ قوسىمشا %5 دىق زەينەتاقى جارنالارى ەسەبىنەن زەينەتاقى تولەمدەرى؛

- ەرىكتى زەينەتاقى جيناقتارى.

جاڭا جۇيە جايلى ازاماتتاردىڭ پىكىرى ءارقيلى. قازاقستان رەسپۋبليكاسى پرەزيدەنتىنىڭ اكىمشىلىگى الەۋمەتتىك- ەكونوميكالىق مونيتورينگ ءبولىمىنىڭ مەڭگەرۋشىسى دانيار اقىشەۆتىڭ پىكىرىنشە، مەملەكەت بازالىق زەينەتاقىنى ەڭبەك وتىلىنە جانە زەينەتاقى جۇيەسىنە قاتىسۋ وتىلىنە بايلانىستى تولەيتىن بولادى. «وسىلايشا، 2017 -جىلدىڭ ورتاسىنان باستاپ بازالىق زەينەتاقى تاعايىندالعاندا «تەڭەستىرۋدەن» شىعۋ جوسپارلانىپ وتىر. جاڭا مودەل ءبىر جاعىنان كەدەيلىكتىڭ الدىن الاتىن، ەكىنشى جاعىنان ەلدىڭ قارجى- ەكونوميكالىق مۇمكىندىكتەرىنەن تاۋەلدى بولاتىن جاڭا ەڭ تومەنگى الەۋمەتتىك ستاندارتتاردى قالىپتاستىرۋدى كوزدەيدى. ەڭ تومەنگى الەۋمەتتىك ستاندارتتار ءاربىر ازاماتتىڭ ءوز قابىلەتىن ىسكە اسىرۋى ءۇشىن بىردەي جاعدايلار جاساۋدىڭ كەپىلى بولۋى كەرەك، ماسىلدىق كوڭىل- كۇيدى ىنتالاندىرماۋ كەرەك، ءاربىر ادام جەكە ءوز كۇش- جىگەرىن جۇمساۋى كەرەك. الەۋمەتتىك قامسىزداندىرۋدىڭ جانە الەۋمەتتىك قولداۋدىڭ الەۋمەتتىك يدەولوگياسىن وزگەرتۋ مىندەتى تۇر»، - دەيدى د. اقىشيەۆ.

ال، «دەلويت» كومپانياسىنىڭ مەنەدجەرى ن. كورولكوۆ ءار قىزمەتكەرگە 5 پايىزدىق جارنا تولەۋگە كەي بيزنەس نىساندارى دايىن ەمەس دەگەن ويدا. «تۇجىرىمداما وتە ماڭىزدى بىرنەشە وزگەرىس اكەلەدى. وعان وپتيميستىك كوزقاراستا قاراعان ابزال. تۇجىرىمداما نەگىزدەرىن ەنگىزۋ - مۇنداعى ەڭ ماڭىزدى فاكتور بولماق. قۇرىلىمدىق وزگەرىستەردى ەنگىزۋ جانە جۇيەنى قايتا قۇرۋعا ءبىرشاما كوپ ۋاقىت جۇمسالۋى عاجاپ ەمەس. سوندىقتان، زەينەتكە شىققان جانە جۋىق ارادا شىعاتىن ادامدار ءوز كۇشتەرى مەن جيعان قارجىلارىنا كوبىرەك سەنگەندەرى ءجون»، - دەيدى مەنەدجەر.

جانات قاپالبايەۆا

سوڭعى جاڭالىقتار