داعدارىسسىز دامۋ بولمايدى - س. قالي ۇلى

ول جاھاندانۋ كەزەڭىندە اشىق مەملەكەتتەر ءۇشىن قالىپتى جاعداي.
بۇل تۋرالى ۇلتتىق ۆاليۋتا - تەڭگەنىڭ اشىق اينالىمعا شىعۋىنا بايلانىستى «قازاقپارات» تىلشىسىنە بەرگەن سۇحباتىندا بۇگىندە قازاق بالالار ادەبيەتىنىڭ اتاسى اتانعان كورنەكتى اقىن، اۋدارماشى سۇلتان قالي ۇلى ايتتى. ونىڭ پىكىرىنشە حالىقتىڭ بىرلىگى كەز كەلگەن داعدارىستى جەڭە الادى. تەك بۇعان قاشان دا دايىن بولۋ كەرەك.
دەگەنمەن، قازىرگى جاعدايدا قاراپايىم حالىق ناقتى نە ىستەۋى كەرەك؟ تەڭگەنىڭ قۇنسىزدانۋى حالىقتىڭ ءال- اۋقاتىنا كەرى اسەر ەتپەي مە؟ اقىن وسى جانە وزگە دە سۇراقتارعا جاۋاپ بەردى.
- سۇلتان اعا، تەڭگە ەركىن اينالىمعا شىعارىلدى. ءسىز مۇنى قالاي قابىلدادىڭىز؟
- بۇل دۇرىس شەشىم. الەمدىك داعدارىس اياسىندا سىرتقى كەرى ىقپالداردى ازايتۋ ماقساتىندا جاسالعان شارا. قازىر ەلباسىمىز نۇرسۇلتان نازاربايەۆ بارلىق جاعدايدى قالت جىبەرمەي باقىلاپ وتىر. ول كىسىنىڭ قاي سالا بولماسىن باستامالارى قوعامدا جىلى قابىلدانادى. داعدارىس بولعان سوڭ، قيىندىقسىز بولمايدى، ارينە. ونسىز دامۋ دا بولمايدى.
- سۇلتان اعا، قازىر الەمدە بولىپ جاتقان قارجى داعدارىسى، سانكتسيا جانە مۇناي باعاسىنىڭ ءتۇسىپ جاتقاندىعى جايلى پىكىرىڭىزدى بىلدىرسەڭىز.
- ەندى، قازىر تەڭگە عانا ەمەس، كوپتەگەن ەلدەردىڭ ۆاليۋتاسى قۇنسىزدانىپ جاتىر عوي. مۇناي باعاسى قۇلدىرادى. بۇل داعدارىستى ۋشىقتىرا تۇسۋدە. ءبىراق مۇنىڭ بارلىعى بەلگىلى ءبىر ەلدەردىڭ قولدان جاساپ وتىرعان تىرلىگى دەر ەدىم. دەمەك، ءبىزدىڭ دامۋىمىزعا كەسە- كولدەنەڭ تۇرعىسى كەلەتىندەر جەتەرلىك. مۇنى ەسكەرۋ كەرەك. بۇل جەردە ەڭ باستى قۇندىلىعىمىز - بىرلىگىمىز بەن ىنتىماعىمىزدان ايرىلمايىق. شارۋاشىلىقتا ۇساق- تۇيەك بولسا دا وتە ساپالى ونىمدەر جاساۋىمىز كەرەك. ال ونداي ونىمدەردى وتكىزۋگە نارىق قاشان دا تابىلادى. سوندا دۇنيەجۇزىلىك ساۋدا ۇيىمىندا ەركىن سامعاپ جۇرەر ەدىك.
- سۇلتان اعا، وسى تۇرىعىدا ءوز تاراپىڭىزدان جۇرتشىلىققا قانداي تىلەك ايتار ەدىڭىز؟
- قازىر جاعداي كۇردەلى. ءبىز ەڭ باستىسى جالقاۋلىق دەگەن جامان قاسيەتتەن ارىلۋىمىز كەرەك. بيلىكتىڭ ىستەپ جاتقان شارالارىنا تۇسىنىستىكپەن قارايىق. داعدارىس بىزدە عانا بولىپ جاتقان جوق قوي! ول بۇكىل الەمدى جايلاپ جاتىر. سوندىقتان بۇل جەردە بىرلىكتى ويلاپ، ءبىر جەڭنەن قول، ءبىر جاعادان باس شىعارىپ، ارەكەت جاساۋىمىز قاجەت. قازىر اۋىل تۇرعىندارى قالاعا كەلگىش بولىپ كەتتى. قالاعا كەلىپ، قولىن جىلى سۋعا مالعىسى كەلەدى. ارينە، بۇل دا دۇرىس! ءبىراق، اۋىلدا دا مەملەكەتتىڭ كومەگىمەن اتا كاسىپتەرىمىزبەن - مال شارۋاشىلىعىمەن، ەگىندىكپەن، قولونەرمەن اينالىسۋعا بولادى عوي دەپ ويلايمىن. تەك قيىندىعىنا شىداپ، ونى جەڭە بىلسە... ودان كەيىن، تاعى ءبىر ايتاتىن نارسە، ونى كەزىندە ەلباسى دا ايتقان، داراقىلىقتى قويعان ءجون. قازىر جاستاردىڭ ءوزى مەرەيتوي وتكىزۋگە قۇمار بولىپ كەتتى. ءتىپتى 30 جاسىن دا تويلايدى. باياعىدا تەك 60 جاستان باستاپ مەرەيتوي وتكىزۋگە بولاتىندىعى تۋرالى زاڭ بولعان. ول جايىنا قالدى. سوندىقتان ارتىق شىعىنداردان ارىلىپ، بىرلىككە باستايتىن، از دا بولسا شىنايى پايدا اكەلەتىن ناقتى ىستەرگە كوشكەنىمز دۇرىس. قۇر سەلتەڭگە اۋەس بولۋدىڭ قاجەتى جوق. بارلىق نارسەگە بايىپپەن قارايىق.
- سۇلتان اعا، شىعارماشىلىق جۇمىستارىڭىزعا ويىسساق، قازىر قانداي دۇنيەلەر جازىپ ءجۇرسىز؟
- مەن وسى ۋاقىتقا دەيىن 34 كىتاپ شىعارىپپىن. جانرلارى ءار ءتۇرلى. نەگىزى اۋەلى باستاعانىم بالالار ادەبيەتى بولاتىن. قازىر دە نەگىزىنەن سول دەپ ەسەپتەيمىن. ەكى ساتيرالىق ولەڭ كىتابىم شىقتى. ەكى كىتابىم شەت تىلدەرىنە اۋدارىلدى. سونداي- اق باسقا حالىقتاردىڭ بالالارعا ارنالعان ولەڭدەرىن قازاقشاعا اۋداردىم. قازىر، ەندى، جاس كەلىپ قالدى. بولاشاقتى بولجاۋ قيىن. جوسپارعا كەلسەك، قازىر كەزىندە شىقپاي قالعان دۇنيەلەرىمدى رەتتەپ، سولاردى كىتاپ قىلىپ شىعارسام با دەگەن ويىم بار.
اۆتور: جاپپاربەرگەن ايبوتا