قىتاي ەكونوميكاسىنىڭ السىرەۋى جاپونياعا كەرى اسەرىن تيگىزدى

 استانا. قازاقپارات - جاپونيا بىلتىرعى داعدارىستان ەس جيا الماي جاتىر. ول كەزدە سالىق كولەمى ءوسىپ، سالدارىنان سۇرانىس پەن جالپى ىشكى ءونىم ازايعان ەدى. ونىڭ ۇستىنە نەگىزگى يمپورتتاۋشى ەل قىتاي ەكونوميكاسىنىڭ السىرەۋى دە جىعىلعانعا جۇدىرىق بولدى.
None
None

 تاۋار كولەمىنىڭ تىم كوپتىگى مەن ساۋدا اينالىمىنىڭ تومەندەۋى. جاپون ەكونوميكاسىن جارعا جىعىپ بارا جاتقان قوس تۇيتكىل وسى. ءبىر جاعىنان ۇكىمەتتىڭ ساياساتى دا جاعدايدى ۋشىقتىرىپ تۇر. ەل بيلىگى بيۋدجەتكە تۇسەتىن كىرىس كولەمى كوبەيسىن دەپ سالىقتى %3 عا كوتەرگەن ەدى. الايدا بۇل ەكونوميكاعا كومەك ەمەس، كەسىر بولىپ ءتيدى. جالاقى وسپەگەندىكتەن، حالىق قارجىسىن ۇنەمدەپ جۇمساۋعا داعدىلاندى.

اتسۋشي تاكەۋچي، جاپونيا ەكونوميكالىق زەرتتەۋ ورتالىعى دەپارتامەنتىنىڭ اعا قىزمەتكەرى:

- باعا كۇننەن كۇنگە شارىقتاپ بارادى، ال جالاقى كولەمى ءبىر قالىپتان تاپجىلمايدى. قازىر تاۋارلاردىڭ سورەلەردە وتپەي، قاپتاپ تۇرۋى كاسىپورىنداردى تىعىرىققا تىرەپ تۇر. نەگىزگى تۇيتكىل قىتاي ەكسپورتىمەن بايلانىستى. ينۆەستيتسيالىق كاپيتالدىڭ ەكسپورتى وسكەنىمەن، وندىرىستىك تاۋارلار مەن جابدىقتاردىڭ ەكسپورت كولەمى قىسقارىپ بارادى. ءبىراق ساراپشىلاردىڭ بۇل پىكىرىمەن جاپونيا ورتالىق بانكى كەلىسپەيدى. باس بانكير حارۋحيكو كۋرودا قىتايعا ەكسپورت كولەمىنىڭ ازايۋىنان زارداپ شەكپەيمىز دەيدى.

 حارۋحيكو كۋرودا، جاپونيا بانكىنىڭ ءتوراعاسى: - قىتاي جالپى ىشكى ءونىمىنىڭ ءوسىمى كەلەسى نەمەسە وسى جىلى 6-7 پايىزدى قۇرايدى دەپ ۇمىتتەنەمىن. ءبىز تاۋارلار مەن تۇتىنۋشى ءونىمىن ەكسپورتتايمىز. سونداي- اق بۇل تاۋارلار باسەكەگە قابىلەتتى ەكەنىن ايتا كەتۋ كەرەك. قىتاي الەمنىڭ ەكىنشى ەكونوميكاسى جانە ونداعى جاعداي ازيالىق جانە الەمدىك نارىققا اسەر ەتەتىنى ءسوزسىز. ءبىراق كەيبىر ادامدار تىم پەسسيميستى كوزقاراستى ۇستانىپ وتىر. ال قىتاي ەكونوميكاسىنىڭ ءوسىمى بۇرىنعىداي قاۋقارلى. جاپونيا ورتالىق بانكى مەن ۇكىمەتىنىڭ ەندىگى مەجەسى %2- دىق ينفلياتسيا. الايدا مۇنايدىڭ الەمدىك باعاسىنىڭ قۇلدىراۋى بۇل ماقساتتى الىستاتىپ تۇر. جاھانداعى جاعدايدىڭ كۇردەلىلىگىنە قاراماستان، جاپون ەكونوميكاسىنا قاتىستى بولجام جاعىمدى. كۋرودا ءتىپتى باس رەتتەۋشى قارجى- نەسيە ساياساتىن تۇزەتۋ شارالارىنا بارسا دا، كوپ ۇزاماي، كوكتەمدە احۋالىمىز جاقسارادى دەگەن سەنىمدە.

 اتسۋشي تاكەۋچي، جاپونيا ەكونوميكالىق زەرتتەۋ ورتالىعى دەپارتامەنتىنىڭ اعا قىزمەتكەرى: - قازىر جاپونيا بيۋدجەت تەڭگەرىمىن قالىپقا كەلتىرىپ، العا جىلجۋ كەرەك. سوندىقتان جۋىق ارادا ەل ەكونوميكاسىنىڭ ءوسىمىن ىنتالاندىرۋ شارالارى كوبەيەدى دەپ ويلايمىن. بۇل شارالار قانشالىقتى ناتيجە بەرەتىنىن ۋاقىت كورسەتەدى. ال ساراپشىلار ءتۇيىننىڭ نەگىزى ادام رەسۋرسىنىڭ جەتىسپەۋىندە. سوندىقتان ۇكىمەت ەكونوميكانى دامىتۋ ستراتەگياسىن قايتا قاراستىرىپ، تۋۋ كورسەتكىشىن كوتەرۋ ءۇشىن جاعداي جاساۋ كەرەك دەيدى.

 اۆتورى: ايگەرىم ورازاليەۆا

http://24.kz

سوڭعى جاڭالىقتار