جاس قازاق سكريپكاشىسى ابايدىڭ ءانىن يزرايل مەن مەكسيكاعا تانىتتى

استانا. قازاقپارات - چايكوۆسكي اتىنداعى حالىقارالىق جاسوسپىرىمدەر بايقاۋىنىڭ جەڭىمپازى، جاس سكريپكاشى رۋسلان تۇرىنتايەۆ جۋىردا يزرايل ەلىندە وتكەن دۇنيەجۇزىلىك جاس سكريپكاشىلار فورۋمىنا قاتىستى. سونىمەن قاتار مەكسيكاعا بارىپ، جەتى بىردەي كونسەرت بەرىپ قايتتى.

 وسى جاڭالىقتارعا وراي رۋسلان، ونىڭ ومىرلىك ۇستازى، ياعني، اكەسى مۇساحان تۇرىنتايەۆ پەن رۋسلاننىڭ ونەرىن قۇرمەتتەيتىن ازاماتتار ەلوردادا باسپا ءسوز ءماسليحاتىن وتكىزدى. جاس تالانتتقا ۇنەمى قولداۋ كورسەتىپ، اقىلىن ايتاتىن ازاماتتاردىڭ اراسىندا بەلگىلى مايدانگەر جۋرناليست، «الەف» يەۆرەي مادەني- اعارتۋ قوعامىنىڭ ءتوراعاسى مويسەي گولدبەرگ تە بار.

 «رۋسلان 16 جاسىندا الەمنىڭ ۇلكەن ساحنالارىنا شىققان بالا. الدىڭعى كۇنى عانا 17 جاسقا تولدى، سوندىقتان ونىڭ بولاشاعى ءالى الدا. بىرنەشە كۇن بۇرىن اباي ەسكەرتىشىنىڭ جانىندا ۇلى اقىننىڭ 170 جىلدىعىنا ارنالعان شاراعا باردىم. جاستار كوپ بولماسا دا، اقساقالدار مەن قوعام قايراتكەرلەرى جينالدى. سول كەزدە رۋسلان بىزگە ابايدىڭ «ايتتىم سالەم قالامقاسىن» سكريپكادا ويناپ بەردى. جەل گۋىلدەپ تۇرسا دا، مۋزىكانى جان- تانىمىزبەن تىڭدادىق. سوندا قازاق دالاسىنىڭ مۋزىكاسى قانداي قۇدىرەتتى ەكەنىن تاعى ۇعىندىق. مىنە، رۋسلان وسى ۇلى ابايدىڭ اۋەنىن يزرايل جەرىنە تانىتىپ، مەكسيكا ەلىندە جەتى كونسەرت قويىپ كەلدى. ابايدىڭ ءانى رۋسلاننىڭ بويتۇمارى بولسا ەكەن» ، - دەگەن تىلەگىن جەتكىزدى م. گولدبەرگ.

 ال رۋسلاننىڭ ءوزى بولسا وعان ارنايى شاكىرتاقى بەرگەن «سامۇرىق- قازىنا» قورىنىڭ باسشىلىعىنا العىسىن جەتكىزىپ، بولاشاققا كوزدەپ وتىرعان ماقساتتارى تۋرالى ايتىپ بەردى.

«ارينە، ارمانىم - وتانىمنىڭ ونەرى مەن مادەنيەتىن الەمگە تانىتۋ، مويىنداتۋ. يزرايلدە وتكەن ۇلكەن فورۋم وسى باعىتتا ءبىراز تاجىريبە بولدى. ۇستازىم، اتاقتى سكريپكاشى ۆلاديمير سپيۆاكوۆتان ءالى دە ۇيرەنەرىم كوپ، بولاشاقتا سونداي بيىككە جەتسەم دەيمىن. ءبىراق ماقساتىم اتاق الۋ ەمەس، سۇيىكتى سكريپكا ونەرىن ابىرويمەن الىپ ءجۇرۋ» ، - دەيدى ر. تۇرىنتايەۆ.

 

اۆتور: كەنجەكەي توقتامۇرات قىزى