ەۋروپا ليگاسى: «قايرات» فۋتبول كومانداسى مەن فرانسيانىڭ «بوردو» فۋتبول كلۋبى كەزدەستى

 الماتى. قازاقپارات- جاڭا عانا الماتىنىڭ ورتالىق ستاديونىندا ەۋروپا ليگاسىنىڭ پلەي- وفف كەزەڭى اياسىندا «قايرات» فۋتبول كومانداسى مەن فرانسيانىڭ «بوردو» فۋتبول كلۋبىنىڭ كەزدەسۋى اياقتالدى.
None
None

 اسا تارتىستى وتكەن ماتچتا الماتىلىقتار قارسىلاستارىن 2:1 ەسەبىمەن تىزە بۇكتىردى. ءبىراق، «بوردو» سىرت الاڭدا گول سوققان سوڭ، كەلەسى توپتىق كەزەڭگە ءوتتى. «قايرات» ەۋروپا ليگاسىندا ويىنىن وسىمەن اياقتادى.

 ال بۇگىن ماتچ وتە تارتىستى ءوتتى. ويىن باستالا سالىسىمەن الاڭ يەلەرى دوپقا يەلىك ەتىپ، جانكۇيەرلەردىڭ قىزۋ قولداۋىمەن باتىل شابۋىلعا كوشكەن ەدى.

 قارسىلاستاردىڭ ايىپ الاڭىندا تۋىنداعان قاربالاس ساتتە قورعاۋشى سەدريك يامبەرە ءوز قاقپاسىنا گول سالىپ قويدى. ەسەپ 1:0 «قايرات» الدا! سول- اق ەكەن، فرانسۋزدار شابۋىلدى ۇدەتە ءتۇستى. ءبىراق، الماتىلىقتار قورعانىستا ساۋاتتى ويناپ، قارىمتا شابۋىلعا شىعىپ وتىردى. ەكى كوماندا دا الما- كەزەك شابۋىل ۇيىمداستىرۋمەن بولدى. بۇگىن جانكۇيەرلەردىڭ قولداۋى ەرەكشە بولدى. «قايرات، چەمپيون!» دەپ ۇزدىكسىز ۇرانداپ جاتتى.

ويىننىڭ ورتاسىنا قاراي، فرانسۋزدىق كوماندا پاس بەرۋدىڭ جانە ايىپ الاڭىنا دوپ اسىرۋدىڭ شەبەرى ەكەندىكتەرىن تانىتتى. ءبىراق «قايرات» قورعانىستا سالقىنقاندىلىق تانىتىپ، ساۋاتتى وينادى. دوپ ءۇشىن تالاستا جانكەشتىلىك تانىتتى. ويىننىڭ 41- مينۋتىندا قارسىلاستار تاراپىنان ايىپ الاڭىنىڭ سىرتىنان تەبىلگەن دوپ پلوتنيكوۆ قورعاعان قاقپانىڭ ۇستىنەن زۋلادى. ال ارتىنشا، 42- مينۋتتا قارسىلاستاردىڭ ايىپ الاڭىندا پاس العان جەرار گوۋ ۇتىمدى ساتتە دوپتى يگەرە الماي قالدى. ءبىرىنشى تايمدا باسقا گول سوعىلعان جوق.

 ەكىنشى تايمدا ويىن اسا تارتىستى بولا ءتۇستى. ويىننىڭ 65- مينۋتىندا قۋات يسلامبەك گول سوعىپ، ەسەپتى 2:0-گە جەتكىزدى. دەگەنمەن، ويىننىڭ 76- مينۋتىندا قارسىلاستار كومانداسىنىڭ ويىنشىسى ەنزو گريۆەللي ەسەپ اشتى. ەسەپ 2:1. بۇدان ارتىق ەسەپ وزگەرگەن جوق. ويىن وسى ەسەپپەن اياقتالدى.

ايتا كەتەلىك، بۇعان دەيىن، ۇستىمىزدەگى جىلى 21- تامىزعا قاراعان ءتۇنى بوردو قالاسىنىڭ «نۋۆو ستاد دە بوردو» ستاديونىندا وتكەن ماتچتا الماتىلىقتار 1:0 ەسەبىمەن جەڭىلىس تاپقان بولاتىن. وسىلايشا، بۇگىنگى ەسەپتىڭ قورىتىندىسى بويىنشا الماتىنىڭ «قايرات» كومانداسى ەۋروپا ليگاسىنان شىعىپ قالدى.

اۆتور: جاپپاربەرگەن ايبوتا

سوڭعى جاڭالىقتار