شىمكەنت اكىمى قالا پروكۋرورلارىن مەكتەپتەردە تەكسەرىس جۇرگىزۋلەرىن توقتاتۋعا شاقىردى

شىمكەنت. قازاقپارات - شىمكەنت قالاسىنىڭ اكىمى قالا پروكۋرورلارىن مەكتەپتەردە تەكسەرىس جۇرگىزۋلەرىن توقتاتۋعا شاقىردى.
None
None

قالا باسشىسى عابيدوللا ءابدىراحىموۆ اكىمدىكتىڭ كەڭەيتىلگەن وتىرىسىندا مەكتەپتەردەگى پروكۋرورلىق تەكسەرىستەر تۋرالى قاتتى ايتىپ ءوتتى. «تەكسەرىكتەر وتە كوپ. ولاردى توقتاتۋ كەرەك. پروكۋورلاردى ءبىزدىڭ وتىرىسىمىزعا شاقىرۋ كەرەك ەدى. مەنىڭ ويىمشا، پروكۋرورلاردىڭ مەكتەپتە ىستەيتىن ىستەرى جوق. پروكۋرورلار قىلمىسكەرلەرمەن اينالىسسىن. بۇل جەردە نۇكتە قويۋىمىز كەرەك، مەن ونىمەن جەكە اينالىسامىن»، - دەپ مالىمدەدى شىمكەنت اكىمى.

پروكۋرورلىق تەكسەرىستەر جونىندە اكىمگە قالالىق ءبىلىم ءبولىمىنىڭ باستىعى ىنتىماق ماديەۆ شاعىمداندى. مىنبەرگە شىعىپ سويلەگەن سوزىندە ول جۋرنالداردى كوپتەپ تەكسەرۋ مۇعالىمدەردىڭ جۇمىسىنا كەدەرگى بولىپ جۇرگەنىن ايتتى. ونىڭ سوزىنەن كەيىن شىمكەنت اكىمى پروكۋرورلارعا توقتاۋ سالاتىنىنا ۋادە بەردى. وسىنداي مالىمدەمە جينالعانداردىڭ قولداۋ قوشەمەتىنە يە بولدى.

كەڭەيتىلگەن وتىرىستا وزگە دە ماسەلەلەر تالقىلانعان. اكىم شىمكەنتتىڭ كوممۋنالدىق سالاسىنا دا كوپ سىن ايتتى. قالانىڭ جاڭا باسشىسىن قالانىڭ كوپ جىل بويى ىستىق سۋسىز بولعانى، ال تۇرعىندارىنىڭ اريستون(سۋ جىلىتقىش) قولدانىپ جۇرگەنى اشۋلاندىردى. ول ميلليون تۇرعىنى بار قالا ءۇشىن بۇل قالىپتى جاعداي ەمەس ەكەنىن ايتتى. قالا باسشىسى بۇل سالادا ءتارتىپ ورناتۋعا شاقىردى.

سوڭعى جاڭالىقتار