ەلىمىزدىڭ بارلىق مەكتەپتەرىندە ءۇش ءپان تەك قازاق تىلىندە وقىتىلماق

استانا. قازاقپارات - ەلىمىزدە مەكتەپتەردەگى ءۇش ءپان تەك قازاق تىلىندە جۇرگىزىلەتىن بولدى. ياعني ءبىلىم مينيسترلىگى «قازاقستان تاريحى»، «قازاق ادەبيەتى» جانە «گەوگرافيانى» مەملەكەتتىك تىلدە جانە ءبىرقاتار ءپاندى اعىلشىنشا وقىتۋدى ءجون كورىپ وتىر.
None
None

ءبىلىم سالاسىنداعى تاعى ءبىر جاڭالىق -  ۇلتتىق ۋنيۆەرسيتەتتەر قازىنا قارجىسىنان مۇلدەم قاعىلۋى مۇمكىن. ءبىلىم سالاسىنا جاۋاپتى بەردىبەك ساپاربايەۆ بۇگىن وسى جاعدايعا ەرەكشە توقتالدى. پرەمەر- مينيستر ورىنباسارىنىڭ ايتۋىنشا، مۇنداي جوعارى وقۋ ورىندارىنىڭ پايداسىنان شىعىنى كوپ، ال جۇمىسىنىڭ ناتيجەسى جوق. مۇنىڭ ءبارى ءداستۇرلى تامىز كەڭەسىندە ءسوز ەتىلدى. ونى تىڭداۋعا دەپۋتاتتار مەن ۇستازدار، ءتىپتى ءىستى بولعان بۇرىنعى ءبىلىم ۆيتسە- ءمينسترى سايات شاياحمەتوۆ تە كەلدى.

اسلان ءسارىنجىپوۆتىڭ «كەمبريدجدەن كەم ەمەسپىز» دەپ ماقتانىشپەن كورسەتىپ تۇرعانى وتاندىق اۆتورلار جازعان اعىلشىن ءتىلىنىڭ وقۋلىقتارى. ءبىلىم مينيسترلىگى جىلداعى ءداستۇرى بويىنشا بيىل دا بار جەتىستىكتەرىن كورمەگە قويىپ، تامىز كەڭەسىن وتكىزدى. باستى قوناق -  پرەمەردىڭ ورىنباسارى ەلەكتروندىق وقۋلىق، ءتۇرلى زەرتحانالىق قۇرال- جابدىقتارمەن تۇگەل تانىسىپ شىقتى. ءتىپتى مۋزىكا ءپانىنىڭ ۇستازدارى ساپاربايەۆتىڭ الدىندا ءان سالىپ ۇلگەردى.

- جۇرگەك پويىز كوڭىلدى، اسۋلاردان اسادى، اۋەنىنە باسادى...

تامىز كەڭەسىنە دەپۋتاتتار، ەلىمىزدىڭ تۇكپىر- تۇكپىرىنەن ۇستازدار كەلگەن. ءتىپتى «وسكەمەندەگى مەكتەپ- ينتەرناتقا بولىنگەن بيۋدجەت قارجىسىن جىمقىردى» دەگەن كۇدىكپەن ءۇيقاماقتا وتىرعان بۇرىنعى ءبىلىم ۆيتسە-ءمينيسترى سايات شاياحمەتوۆ تە ءجۇر. ەكس- شەنەۋنىكتى تۇتقىننان بوساتىپتى. ءبىراق ازىرگە وعان كامەراعا سۇحبات بەرۋگە رۇقسات جوق ەكەن.

- كەلۋگە بولا ما سىزگە مۇنداي جەرلەرگە؟

- بولادى، بولادى، س مەنيا ارەست سنيالي جە.

سوندىقتان سايات شاياحمەتوۆ تە جۇرت قاتارلى زالدا وتىرىپ ورتا ءبىلىم سالاسىن كۇتىپ تۇرعان رەفورمالاردى تىڭدادى. سونىمەن، ءبىلىم مينيسترلىگى مەكتەپ باعدارلاماسىنا ءبىرقاتار وزگەرىستەر ەنگىزبەك. ماسەلەن، باستاۋىش سىنىپتارعا «اقپاراتتىق- كوممۋنيكاتسيالىق تەحنولوگيالار»، «جاراتىلىس تانۋ»، «دۇنيە تانۋ» سىندى پاندەر قوسىلادى. ال «قازاقستان تاريحى» بۇرىنعىداي 6-سىنىپتان ەمەس، 5-سىنىپتان وقىتىلماق. تاعى ءبىر جاڭالىق - ەندى «قازاق ادەبيەتى»، «قازاقستان تاريحى» مەن «گەوگرافيانى» بارلىق سىنىپتاردا تەك مەملەكەتتىك تىلدە وقىتىلادى.

اسلان ءسارىنجىپوۆ، ق ر ءبىلىم جانە عىلىم ءمينيسترى:

- جاڭا باعدارلاماعا 2016 -جىلى ءبىرىنشى سىنىپ كوشەدى، ال 2020 -جىلى مەكتەپ تولىق اۋىسادى. جانە ۇشتىلدىك مودەل ەنگىزەمىز. قازاق ءتىلى مەن ورىس ءتىلىن كەزەڭ- كەزەڭمەن ۇيرەتۋدى ءبىرىنشى سىنىپتان باستايمىز. ال، جوعارى سىنىپتارعا «ينفورماتيكا»، «فيزيكا»، «حيميا»، «بيولوگيا» پاندەرىن اعىلشىن تىلىندە وقىتۋدى ۇسىنامىز.

تامىز كەڭەسىندە جوعارى وقۋ ورىندارىنداعى ءبىلىم ساپاسى دا ءسوز بولدى. پرەمەر- مينيستر ورىنباسارىنىڭ، اسىرەسە، ۇلتتىق ۋنيۆەرسيتەتتەردىڭ جۇمىسىنا كوڭىلى تولمايدى ەكەن. 14 ۇلتتىق ۋنيۆەرسيتكە جىلدا قازىنادان ميلليوندار بولىنەدى، قوسىمشا قارجى كوزى تاعى بار. ءبىراق، پايداسىنان شىعىنى باسىم ەكەن.

بەردىبەك ساپاربايەۆ، ق ر پرەمەر-ءمينيسترىنىڭ ورىنباسارى:

- ۇلتتىق ۋنيۆەرسيتتەردىڭ جۇمىس ىستەپ تۇرعانىنا 14 جىل بولدى. ناتيجە جوق. رەكتورلارى ەشكىمنىڭ الدىندا ەسەپ بەرمەيدى. ولاردىڭ كەيبىرىنىڭ دەڭگەيى قارپايىم جوعارى وقۋ ورنىنان دا تومەن. مۇنداي وقۋ ورىندارىنا ەندى بيۋدجەتتەن اقشا بەرەردە جاقسىلاپ ويلانۋ كەرەك.

وسىلايشا، ورتا ءبىلىم بەرۋ سالاسىن اۋقىمدى وزگەرىستەر كۇتىپ تۇر. ءبىلىم مينيسترلىگى جاڭا وقۋ جىلىندا اسىرەسە، قازاق تىلىنە كوپ كوڭىل بولمەك. سونداي- اق، بيىلدان باستاپ اۋىل- ايماقتارداعى 30 وقۋ ورنى نازاربايەۆ زياتكەرلىك مەكتەبىنىڭ باعدارلاماسىنا، ياعني، حالىقارالىق ستاندارتقا كوشەدى. جانە ءدال وسى وقۋ ورىندارىنداعى ۇل- قىز 12 سىنىپتى ءتامامدايدى. ال جاڭا باعدارلاماعا ەلىمىزدەگى مەكتەپتەر تولىق 2020 -جىلى اۋىسادى ەكەن.

سوڭعى جاڭالىقتار