قازاقستانداعى تومەن بايىتىلعان ۋراننىڭ بانكىندە قالدىقتار ساقتالمايدى - ماگاتە باس ديرەكتورى
بۇل تۋرالى بۇگىن استانادا وتكەن باسپا ءسوز ءماسليحاتىندا ماگاتە باس ديرەكتورى يۋكيا امانو ءمالىم ەتتى.
«قازاقستانداعى تومەن بايىتىلعان ۋراننىڭ بانكىندە قالدىقتاردى ساقتاۋ ويىمىزدا جوق. وندا تومەن بايىتىلعان ۋران كۇيىندەگى ماتەريالدار عانا بولادى. وسى ۋران ارنايى كونتەينەرلەر مەن سيليندرلەردە ساقتالادى جانە بۇلار حالىقارالىق ستاندارتتارعا سايكەس جاسالعان. سوندىقتان دا بۇل كونتەينەرلەر وتە قاۋىپسىز جانە بەرىك ماتەريالداردان قۇراستىرىلعان. اتاپ ايتقاندا، لاڭكەستىك شابۋىلدار نەمەسە تابيعي اپاتتار بولعان جاعدايدا بارلىعىنا توتەپ بەرە الادى»، - دەدى ماگاتە باس ديرەكتورى يۋكيا امانو.
ءوز كەزەگىندە ق ر ەنەرگەتيكا ءمينيسترى ۆلاديمير شكولنيك ش ق و- داعى ءۇلبى مەتاللۋرگيالىق زاۋىتىنىڭ قاۋىپسىزدىگىنە كۇماندانۋدىڭ رەتى جوق ەكەنى اتاپ ءوتتى.
«ماگاتە- ءنىڭ (اتوم ەنەرگەتيكاسى جونىندەگى حالىقارالىق اگەنتتىك) تومەن بايىتىلعان ۋران بانكىنىڭ كولەمى 60 توننانى قۇرايتىن بولادى. زاۋىتتىڭ الاڭىندا ءار كەزدەرى جىلىنا 1,2 مىڭ تونناعا دەيىن وسى ماتەريال وڭدەلگەن بولاتىن. سوندىقتان قاۋىپسىزدىك تۇرعىسىندا بارلىعى تۇسىنىكتى»، - دەدى مينيستر.
سونىمەن قاتار ۆ. شكولنيك زاڭناما بويىنشا قازاقستانعا يادرولىق قالدىقتاردى كىرگىزۋگە تىيىم سالىنعان ەسكە سالىپ ءوتتى.
بۇدان بۇرىن حابارلانعانداي، بۇگىن استانادا قازاقستان ۇكىمەتى مەن اتوم ەنەرگەتيكاسى جونىندەگى حالىقارالىق اگەنتتىك (ماگاتە) ەلىمىزدىڭ اۋماعىندا تومەن بايىتىلعان ۋراننىڭ بانكىن قۇرۋ تۋرالى كەلىسىمگە قول قويدى. اتاپ ايتقاندا، بانك ش ق و- داعى ءۇلبى مەتاللۋرگيالىق زاۋىتىنىڭ اۋماعىندا ورنالاسادى. وندا اتوم ەنەرگەتيكاسىنىڭ قاجەتتىلىگى ءۇشىن پايدالانىلاتىن تومەن بايىتىلعان ۋران ساقتالادى.
